अकुत सम्पत्ति आर्जन गरेको आरोपमा रूपन्देहीका नापी अधिकृत यादवविरुद्ध मुद्दा

काठमाडौं : अख्तियार दुरुपयोग अनुसन्धान आयोगले गैरकानुनी सम्पत्ति आर्जन गरेको आरोपमा नापी कार्यालय भैरहवा, रूपन्देहीका नापी अधिकृत सुग्रीव यादवविरुद्ध विशेष अदालतमा मुद्दा दायर गरेको छ।

आयोगका अनुसार यादवले राजनीतिक व्यक्ति र उच्च पदस्थ विभागीय प्रमुखलाई प्रभावमा पारेर कार्यालय प्रमुखको दरबन्दी लामो समय रिक्त राखी आफूलाई निरन्तर निमित्त प्रमुख बनाएर गैरकानुनी रूपमा सम्पत्ति संकलन गरेका हुन्।

आयोगले २०५३ असार १३ गतेदेखि २०८१ असार १६ गतेसम्मको अवधिको परीक्षण गर्दा अनियमितता देखिएको जनाएको छ।

सो अवधिमा यादवले विभिन्न स्रोतबाट नौ करोड तीन लाख ९५ हजार ४४४ रुपैयाँ वैध आय आर्जन गरेको देखिएको छ। तर, उनले १४ करोड ८३ लाख ५७ हजार ८८४ रुपैयाँ खर्च र लगानी गरेको पाइएको छ। यसरी वैध आय र खर्चबीच पाँच करोड ७९ लाख ६२ हजार ४४० रुपैयाँ बराबरको स्रोत नखुलेको आयोगको ठहर छ।

आयोगले सो बराबरको बिगो दाबी गर्दै विशेष अदालतमा मुद्दा दायर गरेको हो। गैरकानुनी सम्पत्ति यादवले आफ्नी श्रीमती गायत्री यादव र छोराहरू सुधान्सु यादव तथा शुभम यादवको नाममा राखेको पाइएको आयोगले जनाएको छ।

उनीहरूविरुद्ध पनि प्रतिवादी कायम गर्दै मुद्दा दायर गरिएको अख्तियारका सहायक प्रवक्ता गणेशबहादुर अधिकारीले जानकारी दिए।

भदौ १३, २०८२ शुक्रबार १७:४१:१७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।