अमेरिका भ्रमण सकेर संसद्मा फर्किइन् उपसभामुख

काठमाडौं : अमेरिका भ्रमण सकेर स्वदेश फर्किएपछि उपसभामुख इन्दिरा रानामगर शुक्रबार संसद्मा उपस्थित भएकी छन्। उपसभामुख अमेरिकामा रहेको समयमा सरकारले उनलाई हटाउन हस्ताक्षर संकलन गरेको थियो। 

भदौ ३ र ४ गते सत्तापक्षका दुवै दलले आफ्ना सांसदलाई खाली कागजमा हस्ताक्षर गराएका थिए। सिंहदरबारस्थित संसदीय दलको कार्यालयमा आकस्मिक रूपमा सांसदलाई बोलाएर हस्ताक्षर संकलन गरिएको थियो।

तर कांग्रेसभित्र भने यसबारे मतभेद देखिएको छ। शेखर कोइराला पक्ष सांसदहरूले भने हस्ताक्षर गरेका छैनन्। 

भदौ २ गते सोमबार प्रधानमन्त्री निवास बालुवाटारमा बसेको बैठकमा प्रधानमन्त्री, उपप्रधानमन्त्री पूर्णबहादुर खड्का, गृहमन्त्री रमेश लेखकसहित शीर्ष नेताहरू सहभागी भएर उपसभामुखलाई हटाउने निर्णयमा सहमति जुटाएका थिए। 

यसबारे समाचार बाहिरिएपछि विपक्षी दलहरूले उपसभामुखलाई हटाए आन्दोलनमा उत्रिने चेतावनी दिएका थिए। यसअघि पनि कांग्रेस-एमालेले उपसभामुख रानामगरलाई हटाउने तयारी गरेका थिए। 

भदौ १३, २०८२ शुक्रबार १५:५७:२८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।