चीन भ्रमणमा नेपालको हित र प्रतिष्ठालाई माथि उठाउने प्रधानमन्त्रीको दाबी, पुटिनलाई पनि भेट्ने
काठमाडौं : प्रधानमन्त्री केपी शर्मा ओली आगामी भदौ १४ देखि १८ गतेसम्म जनवादी गणतन्त्र चीनको ५ दिने आधिकारिक भ्रमणमा जाँदैछन्। उनले शुक्रबार प्रतिनिधि सभामा जानकारी दिँदै यस भ्रमण चीनका राष्ट्रपति सी चिनफिङको निमन्त्रणामा हुन लागेको बताए।
प्रधानमन्त्री ओलीले मेरो नेतृत्वमा गएको प्रतिनिधिमण्डलले नेपालको हित र प्रतिष्ठालाई माथि उठाउने गरी काम गर्ने दाबी गरे। उनले भ्रमणका क्रममा चीनको थियानजिनमा आयोजना हुने शाङ्घाई सहयोग संगठन (एससिओ) को शिखर सम्मेलनमा भाग लिनेछन्। नेपालले यस अवसरलाई संगठनमा आफ्नो सहभागिता विस्तार गर्ने, क्षेत्रीय तथा अन्तर्राष्ट्रिय मामिलामा नेपालको दृष्टिकोण स्पष्ट रूपमा प्रस्तुत गर्ने र राष्ट्रिय हित प्रवर्द्धन गर्ने माध्यमका रूपमा लिएको उनको भनाइ छ।
भ्रमण टोलीमा राधिका शाक्य, पूर्वउपप्रधानमन्त्री पूर्णबहादुर खड्का, शिक्षा मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, प्रधानमन्त्रीका आर्थिक सल्लाहकार डा. युवराज खतिवडा, सांसद छबिलाल विश्वकर्मासहित उच्चपदस्थ सरकारी अधिकारीहरू रहनेछन्।
ओलीले भ्रमणका क्रममा चीनका राष्ट्रपति सी चिनफिङसँग द्विपक्षीय वार्ता गर्ने कार्यक्रम रहेको छ। त्यस्तै, बेइजिङमा उपराष्ट्रपति हान चङ्गसँग भेटवार्ता गर्ने र राष्ट्रपति तथा उपराष्ट्रपतिले आयोजना गर्ने औपचारिक भोजमा सहभागी हुनेछन्।
भदौ १६ गते (सेप्टेम्बर १) थियानजिनमा हुने एससिओ प्लस शिखर सम्मेलनमा सम्बोधन गर्ने र विभिन्न मुलुकका राष्ट्राध्यक्ष तथा प्रधानमन्त्रीसँग भेटवार्ता गर्ने कार्यतालिका तय भएको छ। हालसम्म रुसका राष्ट्रपति भ्लादिमीर पुटिन, माल्दिभ्सका राष्ट्रपति डा. मोहमद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङसँग छुट्टाछुट्टै भेटवार्ता हुने कार्यक्रम निश्चित भइसकेको प्रधानमन्त्री ओलीले संसद्लाई जानकारी दिए।
भ्रमणको अन्तिम दिन भदौ १८ (सेप्टेम्बर ३) मा प्रधानमन्त्री ओलीले बेइजिङमा आयोजना हुने फासिवादविरुद्धको विश्वयुद्ध र जापानी अतिक्रमणविरुद्धको चिनियाँ जनताको प्रतिरोधी युद्धको ८०औं विजय दिवस समारोहमा सहभागी हुनेछन्।
चीन सरकारले दिएको जानकारीअनुसार ५० भन्दा बढी मुलुकका नेताहरू उक्त समारोहमा उपस्थित हुनेछन्।
सन् २००१ मा स्थापना भएको शाङ्घाई सहयोग संगठन (एससिओ) हाल विश्वकै ठूला क्षेत्रीय संगठनमध्ये एक हो। यसका पूर्ण सदस्य राष्ट्रहरूमा चीन, भारत, रूस, पाकिस्तान, काजाकिस्तान, किर्गिस्तान, ताजिकिस्तान, उज्बेकिस्तान, इरान र बेलारुस छन्। अफगानिस्तान र मंगोलिया पर्यवेक्षक राष्ट्र हुन् भने नेपालसहित १३ मुलुक संवाद साझेदारका रूपमा सहभागी छन्।
भदौ १३, २०८२ शुक्रबार १५:२१:१४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
