‘वीरगञ्जको हैजा रोकथाम गर्न चारवटै सुरक्षा निकायका चिकित्सक र उपकरण परिचालन गरिनेछ’

काठमाडौं : प्रधानमन्त्री केपी शर्मा ओलीले पर्साको वीरगञ्जमा फैलिएको हैजा नियन्त्रणका लागि चारवटै सुरक्षा निकायका चिकित्सक र आवश्यक उपकरण परिचालन गरिने बताएका छन्।

शुक्रबार प्रतिनिधि सभाको बैठकलाई सम्बोधन गर्दै प्रधानमन्त्री ओलीले स्वास्थ्य तथा जनसङ्ख्या मन्त्रालयको समन्वयमा नेपाली सेनासहित सुरक्षात्मक संयन्त्र प्रयोग गर्ने निर्णय आजकै मन्त्रिपरिषद् बैठकले गरेको जानकारी दिए।

उनले महामारीबाट हालसम्म तीन जनाको मृत्यु भएकोप्रति दुःख व्यक्त गर्दै रोग नियन्त्रण चाँडै हुने विश्वास व्यक्त गरे।

प्रधानमन्त्री ओलीका अनुसार हैजाका बिरामीलाई नारायणी अस्पतालमा निःशुल्क उपचारको व्यवस्था गरिएको छ भने निजी अस्पतालहरूमासमेत उपचार भइरहेको छ। साथै रोगको स्रोत पत्ता लगाउन खोजी कार्य जारी रहेको र स्थानीय तहमा सचेतना कार्यक्रम सुरु गरिएको उनले बताए।

भदौ १३, २०८२ शुक्रबार १५:०६:५८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।