कवाडी व्यवसायीहरूमाथिको अत्याचार तत्काल रोकियोस् : सांसद यादव

काठमाडौं : नेपाली कांग्रेसकी सांसद नागिना यादवले काठमाडौँ महानगरपालिकाद्वारा कवाडी व्यवसायीहरूमाथि गरिएका कारबाही र तोडफोड तत्काल रोक्नुपर्ने माग गरेकी छन्।

शुक्रबार प्रतिनिधि सभाको बैठकमा बोल्दै उनले महानगरको कार्यशैलीप्रति गम्भीर आपत्ति जनाइन्। अदालतको आदेश विपरीत कवाडीहरूमाथि अमानवीय व्यवहार गरिएको आरोप लगाउँदै यादवले भनिन्, ‘यस देशका हरेक नागरिकलाई सम्मानपूर्वक जीवन यापन गर्ने अधिकार छ। तर महानगरले कवाडीहरूसँग गरेको व्यवहार अत्याचारपूर्ण र अपमानजनक छ।’

उनका अनुसार केही दिनदेखि कवाडी व्यवसायीहरू महानगरको कारबाहीविरुद्ध आन्दोलनमा छन्, तर सरकारले वार्ता र समाधानका लागि पहल नगर्नु दुःखद भएको छ। ‘सोमबारदेखि व्यवसायीहरू सडकमा छन्। सरकारले तत्काल वार्तामा बोलाएर उनीहरूको माग सम्बोधन गर्नुपर्छ,’ उनले भनिन्।

यादवले कवाडी व्यवसायीहरूमाथि भएको धनजनको क्षति र उत्पीडनबारे छानबिन गरी पीडितलाई न्याय दिन सरकारलाई आग्रह समेत गरिन्।

भदौ १३, २०८२ शुक्रबार १४:५६:४८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।