लिपुलेक-लिम्पियाधुरा विवादलाई संयुक्त राष्ट्र संघमा उठाउन सरकारलाई सांसद शाहीको आग्रह
काठमाडौं : राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले लिपुलेक-लिम्पियाधुरा विवादलाई संयुक्त राष्ट्र संघमा उठाउन सरकारलाई आग्रह गरेका छन्।
शुक्रबार प्रतिनिधि सभाको बैठकमा बोल्दै उनले प्रधानमन्त्रीको आसन्न चीन र भारत भ्रमणमा सीमासम्बन्धी मुद्दा प्रमुख एजेन्डा बनाउनुपर्नेमा जोड दिए। शाहीले भने, ‘प्रधानमन्त्री ज्यू चीन र भारतको भ्रमणमा जानुहुन्छ भन्ने सुनेको छु। लिपुलेक-लिम्पियाधुरा बारे भारत र चीनसँग प्रधानमन्त्री स्तरमै वार्ता गर्नुपर्छ, हामी त्यसका लागि अपिल गर्दछौं।’
उनले नेपाल सन् १९५५ डिसेम्बर १४ मा चीनभन्दा अगाडि नै संयुक्त राष्ट्र संघको सदस्य बनेको स्मरण गराउँदै, ‘संयुक्त राष्ट्र संघमा नेपालको प्रतिनिधित्व छ तर आजसम्म लिपुलेक-लिम्पियाधुराबारे कुरा किन उठाइएन? अब त सरकारलाई खबरदारी गर्न चाहन्छु, यो विषय संयुक्त राष्ट्र संघमा उठ्नैपर्छ,’ भने।
त्यस्तै शाहीले आन्दोलनरत उखु किसानको विषयमा पनि ध्यानाकर्षण गराए। उनले सत्तापक्षका सांसदहरु माइतीघर मण्डलामा गएर फोटो सेशन मात्र गरिरहेको भन्दै आलोचना गरे। ‘उखु किसान माइतीघरमा धर्नामा छन्, तर सत्तापक्षकै मान्यहरु त्यहाँ गएर फोटो खिचिरहेका छन्। त्यसो गर्नु हुँदैन, यही सदनमै सबै एकजुट भएर किसानको पैसा उपलब्ध गराउने व्यवस्था गरौं र चाहिँ फोटो सेशन यहीं गरौं,’ शाहीको भनाइ थियो।
भदौ १३, २०८२ शुक्रबार १४:१८:४४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
