रास्वपा र राप्रपालाई सभामुखले भने- ‘संसद असहमति व्यक्त गर्ने थलो मात्र होइन’
काठमाडौं : सभामुख देवराज घिमिरेले राजनीतिक दलहरूबीच संवादको अभावमा संसदको कामकारबाही लामो समयदेखि अवरुद्ध भएकोमा गहिरो चिन्ता व्यक्त गरेका छन्।
आजको प्रतिनिधिसभा बैठकको प्रारम्भमा बोल्दै उनले सरकार, सत्तापक्ष र प्रतिपक्षलाई संवादको माध्यमबाट सदनको गतिरोध अन्त्य गरी यसलाई आफ्नो मूल लयमा फर्काउन विशेष अपिल गरेका हुन्।
प्रतिपक्षी दल राष्ट्रिय स्वतन्त्र पार्टी र राष्ट्रिय प्रजातन्त्र पार्टीले ‘भिजिट भिसा प्रकरण’को छानबिन लगायतका माग राख्दै निरन्तर सदन बैठकमा असहमति जनाउँदै आएको सन्दर्भमा सभामुखले यो गतिरोध अन्त्यका लागि आफूले सम्भव सबै पहल गरेको तर दलहरूबीच संवादहीनता कायम रहनु चिन्ताको विषय भएको बताए।
‘बैठक सुरु हुनासाथ असहमति प्रदर्शन गर्ने र बाहिरिने प्रवृत्ति संस्थागत लोकतान्त्रिक प्रणाली र संसदीय अभ्यासका दृष्टिले दीर्घकालीन रूपमा हानिकारक सावित हुनसक्छ,’ सभामुखले भने, ‘हामीले भविष्यलाई के सन्देश दिइरहेका छौँ भन्ने विषयमा सबै सचेत रहनु आवश्यक छ।’
सभामुख घिमिरेले संसद केवल असहमति व्यक्त गर्ने स्थल मात्र नभई राष्ट्रिय सहमतिको आवाज प्रकट गर्ने थलो पनि भएको स्मरण गराए।
संघीयता कार्यान्वयनसँग सम्बन्धित महत्त्वपूर्ण विधेयकहरू सदनमा विचाराधीन रहेको अवस्थामा सबै सांसदहरूको गम्भीर र रचनात्मक बहसको खाँचो रहेकोमा सभामुखले जोड दिए।
‘समितिहरूमा जस्तै सभामा पनि संसदको गर्भमा रहेका यी कानूनले सबै माननीयहरूको बहस खोजिरहेको मैले महसुस गरेको छु’, उनले भने।
आजको बैठकमा सम्माननीय प्रधानमन्त्रीले पनि सम्बोधन गर्ने कार्यक्रम रहेको जानकारी गराउँदै सभामुख घिमिरेले सबै सांसदहरूलाई बैठकमा पूर्ण रूपमा सहभागी हुन आग्रह गरे।
उनले दलहरूलाई तत्काल संवादको वातावरण निर्माण गरी सदनलाई सुचारु गराउन पुनः आह्वान गरे।
भदौ १३, २०८२ शुक्रबार १३:५७:३० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
