प्रहरी नेतृत्व छनोटमा ‘चमत्कार’, अवकाशको पाँच दिनअघि नै नयाँ आईजीपी नियुक्त
काठमाडौं : अवकाश भएर बिदाइको लागि प्रहरी प्रधान कार्यालयमा कार्यक्रम राखिसक्दा पनि नयाँ प्रहरी महानिरीक्षक कुरेर बस्न बाध्य प्रहरी संगठनमा सरकारले ‘चमत्कार’ गर्दै बहालवाला आईजीपीको अवकाशको पाँच दिनअघि नै नयाँ आईजीपी नियुक्तिको निर्णय गरेको छ।
भदौ १८ मा दीपक थापा अवकाशमा जाने भएपछि शुक्रबार बसेको मन्त्रिपरिषद्को बैठकले प्रहरी अतिरिक्त महानिरीक्षक (एआईजी) चन्द्रकुवेर खापुङलाई प्रहरी महानिरीक्षक नियुक्त गर्ने निर्णय गरेको हो।
अवकाशको ३० वर्षे सेवा अवधिका कारण थापा आईजीपी नियुक्त भएको छ महिनामै अवकाशमा जान लागेका हुन्। प्रतिनिधि सभामा पुगेको प्रहरी विधेयक पारित भएको भए थापाको छ महिना अवधि लम्बिन्थ्यो।
विद्यमान अवकाशको कानुन संशोधन नभए केन्द्रीय अनुसन्धान ब्यूरोका प्रमुख रहेका खापुङ दुई महिनामै अवकाशमा जानेछन्।
खापुङ २०५२ सालमा प्रहरी निरीक्षक हुँदै प्रहरीमा प्रवेश गरेका थिए। खापुङ पनि हालका महानिरीक्षक थापाकै ब्याचका हुन्।
उनी वैकल्पिक उम्मेदवारका रूपमा दुई महिनापछि भर्ना भएकाले आइजीपी नियुक्त भए। थापासँगै नियुक्त भएको भए सँगै अवकाशमा जान्थे।
भदौ १३, २०८२ शुक्रबार १३:२३:४३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
