रास्वपा नेता अरनिकोले महिलालाई 'वेश्या' भन्दै पठाएका थिए अश्लील सन्देश

काठमाडौं : राष्ट्रिय स्वतन्त्र पार्टीका केन्द्रीय सदस्य अरनिको पाँडेले एक महिलालाई वेश्या भन्दै अश्लील मेसेज पठाएको खुलेको छ।

उनले ह्वाट्सएपमा मेसेज पठाएपछि महिलाले ब्लक गरेको र पछि आफ्नो इमेलमार्फत महिलाको इमेलमा अश्लील सन्देश पठाएको शुक्रवार दर्ता भएको अभियोग पत्रमा उल्लेख छ।

जुन इमेलबाट महिलाको इमेलमा अश्लील मेसेज गएको छ त्यो आफ्नै भएको र आफूले नै पठाएको हुनसक्ने भन्दै पाँडेले समेत अभियोग स्वीकार गरेका छन्।

बयानमा जाहेरीकर्ता महिलाले पाँडेसँग परिचय भएपछि ह्वाट्सएपमा अनावश्यक सन्देश पठाएकाले ब्लक गरेको र पछि इमेलबाट अश्लील सन्देश पठाएर मानसिक यातना दिएको उल्लेख छ।

अरनिकोले पनि महिलासँग परिचय रहेको तर महिलाले एकतर्फी आशक्ति राख्न खोजेको दाबी गरेका छन्। उनले आफ्नो इमेलबाट के कस्तो सन्देश पठाएको याद नभएको तर उल्लेखित इमेल आइडी आफूले मात्र चलाउने भएकाले सन्देश आफैंले पठाएको हुनसक्ने बयान दिएको अभियोग पत्रमा उल्लेख छ।

जाहेरी, पाँडेको बयान र अनुसन्धानबाट प्राप्त प्रमाणको आधारमा अभियोग पत्रमा पाँच वर्ष कैद र एक लाखसम्म जरिवानाको माग गरिएको छ।

इसिमोडमा समेत काम गर्ने पाँडेलाई बुधवार प्रहरीले नियन्त्रणमा लिएको थियो। त्यही दिन नियन्त्रणमा लिएका एमाले केन्द्रीय सदस्य ऐन महरलाई हाजिर जमानीमा छाडेर अरनिकोलाई भने उस्तै प्रकृतिको अपराधमा हिरासतमा राखेर म्याद थपिएको थियो।

बिहीबार अदालतले चार दिन हिरासतमा राख्ने अनुमति दिए पनि राज्यको संयन्त्रले चयनमुखी अनुसन्धान गरेको भन्दै आलोचना भएपछि शुक्रवारै अभियोग पत्र दर्ता भएको छ।

उनी रास्वपाको केन्द्रीय सदस्य हुन्। तर रास्वपा उनीबारे मौन छ। यस अगाडि गण्डकीका नेता पक्राउ परे लगत्तै निलम्बन गरेको थियो। 

भदौ १३, २०८२ शुक्रबार १२:५१:०८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।