रास्वपा नेता अरनिको पाँडेविरुद्ध मुद्दा दर्ता, आरोप पुष्टि भए हुनसक्छ पाँच वर्षको जेल सजाय
काठमाडौं : राष्ट्रिय स्वतन्त्र पार्टी (रास्वपा)का केन्द्रीय सदस्य अरनिको पाँडेविरुद्ध जिल्ला अदालत काठमाडौंमा मुद्दा दर्ता भएको छ।
सामाजिक सञ्जालमार्फत एक विवाहित महिलालाई निरन्तर ह्वाट्सएप र इमेलमार्फत यौनिक सन्देशहरू पठाउने, एक्लै भेट्न निरन्तर दबाब दिने र अश्लील सन्देशहरू पठाएको आरोपमा उनीविरुद्ध विद्युतीय कारोबार ऐन, २०६३ अन्तर्गत मुद्दा दायर गरिएको हो।
मुद्दाको अनुसन्धान प्रक्रिया अगाडि बढाउन जिल्ला अदालतले पाँडेलाई चार दिन हिरासतमा राख्न बिहीबार अनुमति दिएको थियो।
पाँडेमाथि लगाइएको विद्युतीय कारोबार ऐनको दफा ४७ मा कम्प्युटर, इन्टरनेटजस्ता विद्युतीय सञ्चार माध्यम प्रयोग गरी सार्वजनिक नैतिकता र शिष्टाचार विरुद्धका सामग्री प्रकाशन गर्ने, महिलालाई जिस्क्याउने वा अपमान गर्ने जस्ता कार्य गरेमा एक लाख रुपैयाँसम्म जरिवाना, पाँच वर्षसम्म कैद वा दुवै सजाय हुनसक्ने कडा कानूनी व्यवस्था छ।
पीडित महिलाले ह्वाट्सएपमार्फत आपत्तिजनक सन्देश पठाएर आफ्नो चरित्रहत्या गरिएको भन्दै जाहेरी दिएपछि अदालतले करिब २० दिनअघि नै पाँडेको नाममा पक्राउ पुर्जी जारी गरेको थियो। बुधबार उनी आफैँ साइबर ब्यूरोमा उपस्थित भएपछि प्रहरीले नियन्त्रणमा लिएर अनुसन्धान प्रक्रिया अगाडि बढाएको हो।
यसैबीच, पाँडे पक्राउ परेको दिन नै उस्तै प्रकृतिको मुद्दामा सत्ताधारी एमाले केन्द्रीय सदस्य ऐन महर पनि साइबर ब्यूरोमा बयानका लागि हाजिर भएका थिए। तर, बयान सकिएपछि महर र उनकी श्रीमतीलाई प्रहरीले हाजिर जमानीमा छाडेको थियो।
एउटै प्रकृतिको मुद्दामा विपक्षी दलका नेताहरूलाई प्रहरीले गरेको फरक व्यवहारको सामाजिक सञ्जालमा आलोचना भइरहेको छ। एक जनालाई हिरासतमा राखेर अनुसन्धान गर्ने र अर्कालाई सामान्य बयानपछि छाड्ने निर्णयले प्रहरीको अनुसन्धान प्रक्रियामाथि प्रश्न उठेको छ।
भदौ १३, २०८२ शुक्रबार १२:४५:१९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
