आसामविरुद्ध नेपाल ए टोलीले टस जित्यो, टोलीमा दुई परिवर्तन
काठमाडौं : आसामको प्रादेशिक टोलीसँगको दोस्रो टी-२० खेलमा नेपाल ए ले टस जितेको छ।
टस जितेर नेपाल ए टोलीका कप्तान अनिल शाहले ब्याटिङ रोजेका छन्। योसँगै आसामको भूमिमा नेपालको आज ब्याटिङ परीक्षण हुनेछ।
आजको खेलमा नेपाल एको टोलीले दुई परिवर्तन गरेको छ।
हिजो ब्याटिङको ओपनिङमै आएका इशान पान्डेको स्थानमा देव खनाल र स्पिनर सागर ढकालको ठाउँमा युवराज खत्रीलाई मौका दिइएको छ।
हिजो भएको पहिलो टी२० खेलमा आसामले नेपाल ए टोलीलाई १९१ रनको लक्ष्य दिएको थियो।
तर, लक्ष्य पछ्याउने क्रममा बीचमै वर्षाका कारण खेल रोकिएपछि आसामको टोलीले डीएलएस विधिबाट १५ रनले खेल जितेको थियो।
आजको खेल आसाम क्रिकेट एकेडेमीमा हुँदैछ भने भोलिदेखि लगातार तीन दिनको खेल साँझ ५ बजे आसाम क्रिकेट एशोसियसनको स्टेडियममा हुनेछ।
भदौ १३, २०८२ शुक्रबार ११:२२:०५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
