रुपन्देही-३ उपनिर्वाचन : रास्वपाको उम्मेदवार छनोटका लागि मतदान जारी, १२ घण्टामा ४२ प्रतिशत मत खस्यो
काठमाडौं : आगामी कार्तिक १७ गते हुने रूपन्देही क्षेत्र नम्बर ३ को उपनिर्वाचनका लागि राष्ट्रिय स्वतन्त्र पार्टी (रास्वपा) ले आफ्नो उम्मेदवार छनोट गर्न प्रारम्भिक निर्वाचन जारी छ।
हिजो बिहान सात बजेदेखि सुरू भएको मतदानमा पहिलो १२ घण्टामै उत्साहजनक सहभागिता देखिएको छ।
पार्टीले उम्मेदवारका लागि आवेदन दिएका नौ जना आकांक्षीहरूबीच प्रतिस्पर्धा गराएको छ। उम्मेदवार चयनका लागि पार्टी सदस्य र केन्द्रीय समितिका सदस्यहरूले मतदान गरिरहेका छन्।
मतदान प्रक्रिया आज साँझ ७ बजेसम्म अर्थात् ३६ घण्टासम्म चल्ने रास्वपा प्रवक्ता मनिष झाले जानकारी दिए।
उनका अनुसार, उक्त निर्वाचन क्षेत्रमा मतदान गर्न योग्य कुल मतदाता संख्या दुई हजार ७७८ रहेको छ। जसमा दुई हजार ७१६ जना सोही क्षेत्रका पार्टी सदस्य र बाँकी केन्द्रीय समितिका सदस्यहरू छन्।
बिहीबार साँझ सात बजेसम्मको पहिलो १२ घण्टाको अवधिमा कुल एक हजार १६९ मत खसेको छ, जुन कुल मतदाता संख्याको ४२.०८ प्रतिशत हो।
आज साँझ मतदान सम्पन्न भएपछि मतगणना गरी सबैभन्दा बढी मत प्राप्त गर्ने व्यक्तिलाई रास्वपाले रूपन्देही क्षेत्र नम्बर ३ को उपनिर्वाचनका लागि आफ्नो आधिकारिक उम्मेदवार घोषणा गर्नेछ।
रास्वपाले पार्टीभित्र लोकतान्त्रिक अभ्यासलाई बढावा दिन महत्त्वपूर्ण निर्वाचनहरूमा प्राथमिक निर्वाचनको प्रक्रिया अपनाउँदै आएको छ।
भदौ १३, २०८२ शुक्रबार ११:०७:१४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
