सन्यासको हल्लाबीच शामीको जवाफ- ‘जुन दिन दिक्क लाग्छ, त्यही दिन मैदान छाड्छु'

एजेन्सी : भारतीय क्रिकेट टिमका तीव्र गतिका बलर मोहम्मद शामीले आफ्नो सन्यासको हल्लालाई पूर्ण रूपमा खण्डन गरेका छन्। ३४ वर्षीय शामीले जबसम्म खेलप्रति आफ्नो लगाव रहन्छ, तबसम्म मैदानमै रहने स्पष्ट पारेका छन्।

आसन्न इंग्ल्यान्ड भ्रमण र यूएईमा सेप्टेम्बर ९ देखि सुरू हुने एसिया कपका लागि भारतीय टिममा छनोट नभएपछि उनको भविष्यबारे अड्कलबाजी भइरहेका बेला शामीको यस्तो भनाइ आएको हो।

एक समाचार च्यानलसँगको कुराकानीमा उनले भने, ‘यदि कसैलाई मसँग समस्या छ भने, अगाडि आएर भनोस्। मेरो सन्यासले कसको जिन्दगी राम्रो हुन्छ र? म कसैको जिन्दगीमा ढुंगा किन बनूँ? जुन दिन मलाई दिक्क लाग्छ, म आफैँ मैदान छाड्नेछु। तपाईं मलाई छनोट नगर्नुहोस्, नखेलाउनुहोस्, मलाई कुनै मतलब छैन। म आफ्नो मिहिनेत जारी राख्नेछु।’

शामीले आफूलाई अन्तर्राष्ट्रिय क्रिकेटमा मौका नदिइए घरेलु क्रिकेट खेल्न पनि तयार रहेको बताए।

‘यदि तपाईं मलाई अन्तर्राष्ट्रिय खेलमा छनोट गर्नुहुन्न भने म घरेलु क्रिकेट खेल्नेछु। म कतै न कतै खेलिरहनेछु,’ उनले भने, ‘सन्यास जस्तो निर्णय तब लिइन्छ, जब तपाईंलाई खेलदेखि दिक्क लाग्छ, जब तपाईं बिहान ७ बजे टेस्ट म्याचका लागि उठ्न चाहनुहुन्न। तर मेरो लागि त्यो समय अझै आएको छैन। आवश्यक परे म बिहान ५ बजे नै उठेर तयार हुन सक्छु।’

शामीले आफ्नो सबैभन्दा ठूलो लक्ष्य एकदिवसीय विश्वकप जित्नु रहेको र त्यो सपना अझै अधुरो रहेको बताए।

२०२३ को विश्वकप फाइनलको स्मरण गर्दै उनले भने, ‘मेरो एउटा मात्र सपना बाँकी छ, त्यो हो एकदिवसीय विश्वकप जित्नु। २०२३ मा हामी उपाधिको निकै नजिक थियौं। हामीमा आत्मविश्वास थियो, तर नकआउट चरणमा डर पनि हुन्छ। सायद त्यो मेरो भाग्यमा थिएन, तर म २०२७ मा त्यहाँ हुन चाहन्छु।’

लामो समय चोटसँग संघर्ष गरेका शामीले पछिल्लो दुई महिनामा आफ्नो फिटनेसमा निकै कडा मिहिनेत गरेको खुलासा गरे। उनले आफ्नो तौल घटाएको, बलिङमा लय हासिल गरेको र लामो स्पेलका लागि आफूलाई तयार पारेको दाबी  गरे।

‘मैले प्रशिक्षण गरेँ, आफ्नो सीपलाई अझ तिखारेँ, ब्याटिङ र फिल्डिङको अभ्यास गरेँ, जिममा पसिना बगाएँ। लय हासिल गर्ने र लामो स्पेल बलिङ गर्नेमा मेरो ध्यान केन्द्रित छ’, उनले भने।

शामीले आफूलाई क्रिकेटसँग अझै पनि प्रेम रहेको बताउँदै भने, ‘जुन दिन यो लगाव सकिन्छ, म आफैँ मैदान छाडिदिनेछु। तर, त्यतिन्जेलसम्म म लडिरहनेछु।’

शामी सन् २०२३ को एकदिवसीय विश्वकप फाइनलपछि चोटका कारण लामो समय मैदान बाहिर थिए। उक्त विश्वकपमा उनले उत्कृष्ट प्रदर्शन गर्दै प्रतियोगिताकै सर्वाधिक विकेट लिने बलर बनेका थिए।

चोटबाट फर्किएपछि उनले आफ्नो फिटनेसमा कडा मिहिनेत गरिरहेका छन् र राष्ट्रिय टिममा पुनरागमन गर्न प्रतीक्षारत छन्।

भदौ १३, २०८२ शुक्रबार ०९:४८:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।