चितवनमा गैंडाको आक्रमणबाट घाँस काट्न गएका एक वृद्धको मृत्यु
चितवन : चितवनको भरतपुरमा जंगली गैंडाको आक्रमणबाट एक जना वृद्धको मृत्यु भएको छ।
जिल्ला प्रहरी कार्यालय चितवनका अनुसार भरतपुर महानगरपालिका-२८ स्थित राप्ती नियन्त्रण मध्यवर्ती सामुदायिक वनमा आइतबार दिउँसो घाँस काट्न गएका स्थानीय ६२ वर्षीय खिम बहादुर सुनारको मृत्यु भएको हो।
प्रहरीका अनुसार, 'मिस्टर' उपनामले चिनिने सुनार सामुदायिक वनको कार्यालयबाट करिब १०० मिटर भित्र घाँस काटिरहेको अवस्थामा गैंडाले उनीमाथि आक्रमण गरेको थियो।
दिउँसो ३:४० बजे घटनाबारे खबर प्राप्त हुनासाथ इलाका प्रहरी कार्यालय, दिवानगरबाट प्रहरी टोली घटनास्थल पुगेको थियो।
प्रहरीले घटनास्थलको मुचुल्का उठाएर शव परीक्षणका लागि भरतपुर सरकारी अस्पताल पठाएको जनाएको छ।
चितवन राष्ट्रिय निकुञ्ज र आसपासका मध्यवर्ती क्षेत्रहरूमा मानव र वन्यजन्तुबीचको द्वन्द्व बढ्दो क्रममा रहेको छ, जसका कारण बेलाबेलामा यस्ता दुःखद घटनाहरू हुने गरेका छन्।
भदौ १३, २०८२ शुक्रबार ०८:५३:२२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
