कैलाश मानसरोवरबाट फर्किंदै गरेकी भारतीय तीर्थयात्रीको धुलिखेलमा मृत्यु
धुलिखेल : कैलाश मानसरोवरको दर्शन गरेर फर्कने क्रममा स्वास्थ्यमा समस्या देखिएपछि उपचारका लागि ल्याइएकी एक भारतीय तीर्थयात्रीको काभ्रेपलाञ्चोकको धुलिखेल अस्पतालमा मृत्यु भएको छ।
जिल्ला प्रहरी कार्यालय, काभ्रेका अनुसार भारतको बैङ्लोर, कर्नाटक निवासी ६२ वर्षीया भर्मलक्ष्मी नरशिम्मा शेट्टीको उपचारका क्रममा शनिबार राति निधन भएको हो।
कैलाश मानसरोवरको तीर्थयात्रा पूरा गरी फर्कने क्रममा उनी सिन्धुपाल्चोकको कोदारी नाकामा एक्कासी बिरामी परेकी थिइन्।
तत्काल उनलाई कोदारीको एक स्थानीय अस्पतालमा सामान्य उपचार गरिएको थियो। स्वास्थ्य अवस्था थप जटिल बनेपछि उनलाई थप उपचारका लागि धुलिखेल अस्पताल पठाइएको थियो।
प्रहरीका अनुसार उनलाई शनिबार राति ९:२० बजे धुलिखेल अस्पतालको आकस्मिक कक्षमा पुर्याइएको थियो। तर, अस्पताल पुगेको ५ मिनेटभित्रै, राति ९:२५ बजे, चिकित्सकले उनलाई मृत घोषणा गरेका थिए।
घटनाबारे आवश्यक कानुनी प्रक्रिया अगाडि बढाइएको प्रहरीले जनाएको छ।
भदौ १३, २०८२ शुक्रबार ०८:४३:२० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
