लामो तनावपछि भारत र क्यानडाद्वारा नयाँ उच्चायुक्त नियुक्त, सम्बन्ध सुधारको सङ्केत

एजेन्सी : लामो समयदेखिको कूटनीतिक तनावका बीच भारत र क्यानडाले एकअर्काको देशमा नयाँ उच्चायुक्त नियुक्तिको घोषणा गरेका छन्। यो कदमलाई दुई देशबीच चिसिएको सम्बन्ध सुधार गर्ने प्रयासका रूपमा हेरिएको छ।

भारत सरकारले वरिष्ठ कूटनीतिज्ञ दिनेश के. पटनायकलाई क्यानडाका लागि भारतको नयाँ उच्चायुक्त नियुक्त गरेको छ। भारतीय विदेश मन्त्रालयका अनुसार, हाल स्पेनका लागि राजदूत रहेका पटनायकले छिट्टै आफ्नो नयाँ जिम्मेवारी सम्हाल्नेछन्।

त्यस्तै, क्यानडाले पनि क्रिस्टोफर कुटरलाई भारतका लागि आफ्नो नयाँ उच्चायुक्त नियुक्त गरेको छ। भारतमा क्यानेडियन उच्चायुक्तको पद गत वर्षदेखि रिक्त थियो।

क्यानडाकी विदेश मन्त्री अनिता आनन्दले एक विज्ञप्ति जारी गर्दै भनिन्, ‘नयाँ उच्चायुक्तको नियुक्तिले भारतसँगको कूटनीतिक सम्बन्धलाई क्रमशः गहिरो बनाउने र द्विपक्षीय सहयोगलाई अगाडि बढाउने क्यानडाको नीतिलाई प्रतिबिम्बित गर्दछ।’

गत वर्ष खलिस्तानी पृथकतावादी नेता हरदीप सिंह निज्जरको हत्यालाई लिएर दुई देशबीचको सम्बन्ध अहिलेसम्मकै खराब अवस्थामा पुगेको थियो।

क्यानडाका तत्कालीन प्रधानमन्त्री जस्टिन ट्रुडोले निज्जरको हत्यामा भारत सरकारको संलग्नता रहेको आरोप लगाएपछि सम्बन्ध चिसिएको थियो। भारतले उक्त आरोपलाई निरन्तर रूपमा खण्डन गर्दै आएको छ।

यही विवादका कारण क्यानडाले भारतीय कूटनीतिज्ञलाई निष्कासन गरेको थियो भने बदलामा भारतले पनि क्यानेडियन कूटनीतिज्ञहरूलाई देश छाड्न आदेश दिएको थियो। यस घटनापछि दुवै देशमा उच्चायुक्तको पद रिक्त रहेको थियो।

भदौ १३, २०८२ शुक्रबार ०८:२२:४२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।