देशका विभिन्न स्थानमा आज राति र भोलि वर्षा, केही प्रदेशमा भारी वर्षाको सम्भावना
काठमाडौं : जल तथा मौसम विज्ञान विभाग, मौसम पूर्वानुमान महाशाखाका अनुसार आज राति र भोलि देशका विभिन्न स्थानमा वर्षा हुने क्रम जारी रहनेछ।
महाशाखाले गण्डकी, कर्णाली र सुदूरपश्चिम प्रदेशका केही स्थानमा आज राति भारी वर्षाको सम्भावना रहेको जनाएको छ।
महाशाखाका अनुसार आज राति देशभर सामान्यतया बदली रहनेछ। सुदूरपश्चिम प्रदेशसहित देशका पहाडी भू-भागका धेरैजसो ठाउँमा र बाँकी क्षेत्रका थोरै स्थानमा हल्कादेखि मध्यम वर्षाको सम्भावना छ।
विशेषगरी, गण्डकी, कर्णाली र सुदूरपश्चिम प्रदेशका पहाडी तथा तराई भू-भागका एक-दुई स्थानमा भारी वर्षा हुन सक्ने महाशाखाले जनाएको छ।
भोलि दिउँसो पनि देशभर सामान्यतया बदली रही पहाडी भू-भागका केही स्थानमा र तराईका थोरै स्थानमा हल्कादेखि मध्यम वर्षाको सम्भावना छ।
कोशी, गण्डकी र सुदूरपश्चिम प्रदेशका पहाडी क्षेत्रका एक-दुई स्थानमा भने भारी वर्षाको पूर्वानुमान गरिएको छ।
महाशाखाका अनुसार हाल मनसुनको न्यून चापीय रेखा (मनसुन गराउने प्रणाली) पूर्वमा आफ्नो औसत स्थानभन्दा केही दक्षिणतर्फ र पश्चिममा औसत स्थानकै नजिक रहेकोले देशभर मनसुनी प्रभाव सक्रिय रहेको छ।
भारी वर्षाका कारण पहाडी भू-भागमा पहिरो तथा गेग्रान बहावको जोखिम रहन सक्छ। नदी, नाला तथा खहरे खोलाहरूमा पानीको बहाव बढ्न सक्ने भएकाले तटीय क्षेत्रमा बसोबास गर्नेहरूलाई सतर्क रहन आग्रह गरिएको छ।
साथै, वर्षाका कारण यातायात क्षेत्रमा पर्न सक्ने सम्भावित असरबाट बच्न आवश्यक सतर्कता अपनाउन महाशाखाले अनुरोध गरेको छ।
भदौ १३, २०८२ शुक्रबार ०७:३५:३६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
