काभ्रेमा खोलाले बगाएर बालिकाको मृत्यु, एक युवक बेपत्ता
काभ्रेपलाञ्चोक : जिल्लामा बिहीबार भएका दुई छुट्टा-छुट्टै घटनामा खोलाले बगाउँदा एक बालिकाको मृत्यु भएको छ भने एक युवक नदीमा बेपत्ता भएका छन् ।
पनौती नगरपालिका-१ स्थित देबार खोलाले बगाएकी करिब ११ वर्षीया बालिकाको शव बिहीबार साँझ फेला परेको छ।
इलाका प्रहरी कार्यालय, बनेपाका प्रमुख प्रहरी नायब उपरीक्षक (डिएसपी) रामेश्वर त्वाँतीका अनुसार साँझ ५ बजे बालिकाको शव भेटिएको हो।
मृतकको पहिचान खुल्न सकेको छैन र घटनाबारे थप अनुसन्धान भइरहेको प्रहरीले जनाएको छ। शव पोस्टमार्टमका लागि बनेपास्थित शिर मेमोरियल अस्पतालमा राखिएको छ।
यसैगरी, अर्को एक घटनामा भुम्लु गाउँपालिकाका एक युवक भोटेकोशी नदीमा बेपत्ता भएका छन्।
भुम्लु गाउँपालिका-१, रिठ्ठेका २३ वर्षीय महेश दर्जी दोलालघाटस्थित भोटेकोशीमा बेपत्ता भएका हुन्।
प्रहरीका अनुसार नदीमा खसेको आफ्नो कुकर निकाल्न खोज्दा उनलाई नदीले बगाएको थियो।
भुम्लु-८ स्थित दुलालेश्वर मन्दिर नजिकै बस्दै आएका दर्जीको खोजीका लागि नेपाल प्रहरी र सशस्त्र प्रहरीको टोली परिचालन गरिएको छ।
भदौ १३, २०८२ शुक्रबार ०७:१३:४५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
