तेस्रो अभ्यास खेलमा साउथ अस्ट्रेलियासँग तीन विकेटले हार्यो नेपाल
काठमाडौं : अस्ट्रेलिया टुरमा रहेको नेपाली टोली आफ्नो तेस्रो अभ्यास खेलमा साउथ अस्ट्रेलियन टोलीसँग तीन विकेटले पराजित भएको छ।
टस हारेर पहिला ब्याटिङ गरेको नेपालले निर्धारित २० ओभरमा ९ विकेट गुमाउँदै १४६ रन बनाएको थियो। नेपालले दिएको १४७ रनको लक्ष्य साउथ अस्ट्रेलियाले निर्धारित २० ओभरमा ७ विकेट गुमाउँदै भेट्टायो।
जितका लागि १ बलमा ४ रन चाहिएको अवस्थामा अन्तिम बलमा रोहित पौडेललाई साउथ अस्ट्रेलियाका ब्राउनले चौका प्रहार गर्दै साउथ अस्ट्रेलियालाई जित दिलाएका हुन्।
साउथ अस्ट्रेलियाको लागि विन्टरले ३६ रन बनाउँदा हार्बीले २७ रन बनाए। नेपालका लागि सोम्पाल कामीले ३ विकेट र नन्दन यादवले २ र रोहित पौडेलले १ विकेट लिए।
त्यसअघि, ब्याटिङ गरेको नेपालका लागि सार्कीले सर्वाधिक ३२ रन बनाए। ओपनर आशिफ शेखले १३ बलमा २२ रन बनाए।
दिपेन्द्र सिंह ऐरीले २६ र आरिफ शेखले २१ रन बनाए। सोमपाल कामी १८ र सन्दिप लामिछाने ५ रनमा अविजित रहे। अन्य ब्याटरले पनि दोहोरो अङ्कको रन बनाउन सकेनन्।
साउथ अस्ट्रेलियाको लागि बलिङतर्फ टि ब्राउन र एच मानिन्तीले समान २-२ विकेट लिए। एम सि फेडेन र मिनिजले १-१विकेट लिए।
नेपालले यसअघि डार्विनमा टप एन्ड टी-२० सिरिज खेलेको थियो। जसमा नेपालले १० टिमबीच भएको प्रतिस्पर्धामा दुई खेल जित्दै आठौं भएको थियो।
नेपालले शनिबार साउथ अस्ट्रेलियासँगै एकदिवसीय अभ्यास खेल खेल्नेछ।
भदौ १२, २०८२ बिहीबार १०:०४:३९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
