पुजाराको सन्न्यासबारे विराट कोहलीको भावुक पोस्ट: 'मेरो काम सजिलो बनाइदिएकोमा धन्यवाद'

काठमाडौं : भारतीय क्रिकेट टोलीका दिग्गज ब्याट्सम्यान विराट कोहलीले आफ्ना लामो समयका सहकर्मी चेतेश्वर पुजाराका लागि एक भावुक इन्स्टाग्राम पोस्ट लेखेका छन्।

हालै क्रिकेटका सबै प्रारूपबाट सन्न्यास लिने घोषणा गरेका पुजाराको सम्मानमा कोहलीले यो पोस्ट लेखेका हुन्। कोहली र पुजारा लामो समयसम्म भारतीय टेस्ट टोलीका मुख्य आधारस्तम्भ थिए र दुवैले कैयौं महत्त्वपूर्ण साझेदारीहरू गरेका छन्।

कोहलीले आफ्नो इन्स्टाग्राम पोस्टमा पुजारालाई धन्यवाद दिँदै उनको शानदार करियरका लागि बधाई दिएका छन्।

उनले लेखेका छन्, ‘चौथो नम्बरमा मेरो काम सजिलो बनाइदिएकोमा धन्यवाद पुज्जी। तपाईंको करियर शानदार रह्यो। बधाई र भविष्यका लागि शुभकामना। भगवानले तपाईंको कल्याण गरून्।’

कोहली र पुजाराले भारतीय टोलीको मध्यक्रममा सँगै ८३ पारी खेलेका छन्, जसमा उनीहरूले ७ शतकीय र १८ अर्धशतकीय साझेदारीसहित कुल ३५१३ रन जोडेका थिए।

ऐतिहासिक अस्ट्रेलिया भ्रमणका नायक
पुजारा सन् २०१८/१९ को ऐतिहासिक अस्ट्रेलिया भ्रमणमा भारतीय टोलीको जितका प्रमुख नायक थिए।

उक्त बोर्डर-गावस्कर ट्रफीमा उनले सात पारीमा ५२१ रन बनाएका थिए, जसको मद्दतले कोहलीको कप्तानीमा रहेको भारतीय टोलीले अस्ट्रेलियालाई उसकै भूमिमा २-१ ले हराएर इतिहास रचेको थियो।

पुजाराले आफ्नो अन्तिम अन्तर्राष्ट्रिय खेल सन् २०२३ को जुनमा खेलेका थिए। अस्ट्रेलियाविरुद्ध केनिंग्टन ओभलमा भएको विश्व टेस्ट च्याम्पियनसिप २०२३ को फाइनल उनको अन्तिम टेस्ट म्याच थियो। हालै उनी भारतको इंग्ल्यान्ड भ्रमणका क्रममा कमेन्ट्री गरिरहेको देखिएका थिए।

पुजाराको अन्तर्राष्ट्रिय करियर
पुजाराले आफ्नो अन्तर्राष्ट्रिय करियरमा १०३ टेस्ट र ५ एकदिवसीय खेल खेले। टेस्ट क्रिकेटको १७६ पारीमा उनले ४३.६१ को औसतमा ७१९५ रन बनाए, जसमा १९ शतक र ३५ अर्धशतक सामेल छन्। उनको उत्कृष्ट स्कोर २०६ रन हो। यस्तै, ५ एकदिवसीय खेलमा उनले ५१ रन बनाएका थिए।

यसबाहेक, पुजाराले इन्डियन प्रिमियर लिग (आईपीएल) मा ३० खेल खेल्दै २२ पारीमा ९९.७५ को स्ट्राइक रेटमा एक अर्धशतकसहित ३९० रन बनाएका छन्।

भदौ ११, २०८२ बुधबार ०८:४४:४६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।