ट्रम्पद्वारा फेडरल रिजर्भ गभर्नर बर्खास्त

एजेन्सी : अमेरिकी राष्ट्रपति डोनाल्ड ट्रम्पले फेडरल रिजर्भकी गभर्नर लिसा कुकलाई पदबाट हटाउन आदेश दिएका छन्। कुनै राष्ट्रपतिले फेडरल रिजर्भका गभर्नरलाई हटाउने प्रयास गरेको यो घटना अमेरिकी इतिहासमा पहिलो पटक हो।

राष्ट्रपति ट्रम्पले गभर्नर कुकलाई ‘धितो सम्बन्धी कागजातहरूमा गलत जानकारी दिएको’ आरोप लगाउँदै संविधानले आफूलाई यस्तो कारबाही गर्ने अधिकार दिएको दाबी गरेका छन्।

तर, गभर्नर कुकले राष्ट्रपतिको यो कदमलाई ठाडै अस्वीकार गरेकी छिन्। उनले उक्त निर्णयलाई ‘पूर्ण रूपमा गैरकानूनी’ भन्दै राष्ट्रपतिसँग आफूलाई बर्खास्त गर्ने कुनै अधिकार नभएको र आफूले पदबाट राजीनामा नदिने बताएकी छन्।

यो घटनाको पछाडि राष्ट्रपति ट्रम्प र फेडरल रिजर्भबीच लामो समयदेखि चल्दै आएको ब्याजदर सम्बन्धी विवाद मुख्य कारण हो। ट्रम्पले अमेरिकी अर्थतन्त्रलाई प्रोत्साहन गर्न भन्दै ब्याजदर घटाउन केन्द्रीय बैंकलाई निरन्तर सार्वजनिक रूपमै दबाब दिइरहेका छन्।

तर, जुलाईको अन्त्यमा भएको फेडरल रिजर्भको बैठकमा गभर्नर कुक, अध्यक्ष जेरोम पावेल र अधिकांश बोर्ड सदस्यहरूले मुद्रास्फीति नियन्त्रणलाई प्राथमिकता दिँदै ब्याजदर यथावत राख्ने पक्षमा मतदान गरेका थिए।

फेडरल रिजर्भको यो स्वतन्त्र निर्णय ट्रम्पलाई मन परेको थिएन, जसकारण उनले कुकमाथि व्यक्तिगत रूपमा निशाना साँधेको अनुमान गरिएको छ।

लिसा कुकलाई ट्रम्पका पूर्ववर्ती डेमोक्र्याट राष्ट्रपति जो बाइडेनले सन् २०२२ मा नियुक्त गरेका थिए। उनी फेडरल रिजर्भको गभर्नर पदमा सेवा गर्ने पहिलो अफ्रिकी-अमेरिकी महिला हुन्, जसले उनको नियुक्तिलाई ऐतिहासिक बनाएको थियो।

भदौ १०, २०८२ मंगलबार १८:५७:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।