ट्रम्पको चेतावनी- दुई हप्तामा रुस-युक्रेन युद्धविराम नभए अमेरिकाले ठूलो निर्णय लिनेछ

एजेन्सी : अमेरिकी राष्ट्रपति डोनाल्ड ट्रम्पले आगामी दुई हप्तामा युक्रेन युद्धको शान्तिपूर्ण समाधान नभए रूसमाथि कडा प्रतिबन्ध वा कर लगाउने निर्णय लिने बताएका छन्।

अगस्ट १५ मा अलास्कामा रुसी राष्ट्रपति भ्लादिमिर पुटिनसँगको भेटघाटको एक हप्तापछि ट्रम्पको यो बयान आएको हो।

ह्वाइट हाउसमा पत्रकारहरूसँग कुरा गर्दै ट्रम्पले भने, ‘म चाँडै निर्णय गर्नेछु। यो धेरै महत्त्वपूर्ण निर्णय हुनेछ, चाहे त्यो ठूलो मात्रामा प्रतिबन्ध होस्, कर होस् वा दुवै। वा हामी यो पनि भन्न सक्छौं कि यो तपाईंको लडाई हो, अमेरिकाको होइन।’

उनले युक्रेनको एक अमेरिकी कारखानामा हालै भएको रुसी आक्रमणप्रति आक्रोश व्यक्त गरे। यो आक्रमणबाट कारखानामा आगलागी भएको थियो र धेरै कामदारहरू घाइते भएका थिए।

‘म यसमा खुसी छैन, न त युद्धको बारेमा केहि पनि’, ट्रम्पले भने।

ओभल अफिसमा पत्रकारहरूसँग कुरा गर्दै उनले भने, ‘रूस-युक्रेन युद्धमा जे भइरहेको छ त्यसबाट म खुसी छैन। अर्को दुई हप्ताले यसले कुन दिशा लिनेछ भनेर देखाउनेछ।’

ट्रम्पले रुसी राष्ट्रपति पुटिन र युक्रेनी राष्ट्रपति भोलोदिमिर जेलेन्स्कीबीच प्रत्यक्ष भेटवार्ताको वकालत गरे।

उनले भने, ‘म चाहन्छु कि दुबै नेताहरू सँगै बसून्। यदि उनीहरूले त्यसो गरेनन् भने, म यो किन भयो भनेर हेर्नुपर्नेछ।’

उनले आफ्नो कार्यकालमा सातवटा युद्ध रोकेको र तीनवटा सम्भावित युद्धलाई टारेको दाबी गरे।

ट्रम्पले भने, ‘म यो युद्धबाट खुसी छैन। आगामी दुई हप्तामा हामीलाई थाहा हुनेछ कि यो मामिला कुन दिशामा जान्छ।’

यसअघि अगस्ट १८ मा, राष्ट्रपति जेलेन्स्कीले युद्ध अन्त्य गर्ने प्रयासहरूबारे छलफल गर्न युरोपेली नेताहरूसँग ह्वाइट हाउसको भ्रमण गरेका थिए।

जेलेन्स्कीलाई भेटेपछि ट्रम्पले पुटिन-जेलेन्स्की भेटघाटको व्यवस्था गर्न थालेको बताए।

यद्यपि, अगस्ट १५ मा अलास्कामा ट्रम्प र पुटिनबीच शिखर सम्मेलन भए पनि, रूस र युक्रेन युद्धविराममा सहमत हुन सकेनन्।

भदौ ७, २०८२ शनिबार ११:०५:०२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।