भारतले रुसी तेलबाट ‘नाफाखोरी’ गरिरहेको अमेरिकी अर्थमन्त्रीको आरोप
एजेन्सी : अमेरिकी अर्थमन्त्री स्कट बेसेन्टले मंगलबार भारतमाथि रुसबाट सस्तो कच्चा तेल किनेर प्रशोधन गरी महँगोमा बेचेर ‘नाफाखोरी’ गरिरहेको गम्भीर आरोप लगाएका छन्।
बेसेन्टको यो टिप्पणी यस्तो समयमा आएको हो, जतिबेला ट्रम्प प्रशासनले भारतमाथि कुल ५० प्रतिशतको भारी ट्यारिफ लगाएको छ। यसमा रुसी तेल खरिदमा २५ प्रतिशत अतिरिक्त शुल्क पनि समावेश छ, जुन अगस्ट २७ देखि लागू हुनेछ।
समाचार एजेन्सी पीटीआईका अनुसार, न्युज च्यानल सीएनबीसीसँग कुरा गर्दै बेसेन्टले भने कि रुस-युक्रेन युद्धपछि रुसबाट चीनको तेल आयात केवल ३ प्रतिशतले बढ्यो, जबकि भारतको आयात ४० प्रतिशतभन्दा बढीले बढेको छ।
उनले भने, ‘भारतले केवल नाफाखोरी गरिरहेको छ। यसबाट उसले १६ अर्ब डलरको अतिरिक्त नाफा कमाएको छ। भारतका केही धनी परिवारले यसबाट लाभ उठाएका छन्। यो बिल्कुलै अस्वीकार्य छ।’
बेसेन्टले ब्लूमबर्गलाई दिएको अर्को अन्तर्वार्तामा यो पनि संकेत दिए कि यदि राष्ट्रपति ट्रम्प र रुसी राष्ट्रपति पुटिनबीचको वार्तामा सहमति हुन सकेन भने भारतमाथि रुसी तेल खरिदमा थप प्रतिबन्धहरू लगाउन सकिन्छ।
यता, भारतले अमेरिकाको यो एकतर्फी कदमलाई ‘अनुचित’ ठहर गरेको छ। वाणिज्य तथा उद्योग राज्यमन्त्री जितिन प्रसादले संसदमा बोल्दै सरकारले आफ्नो राष्ट्रिय हित र आर्थिक सुरक्षाको रक्षाका लागि सबै आवश्यक कदम उठाउने बताए।
यसैबीच, दुई देशबीच व्यापार सम्झौतामा चलिरहेको वार्ता पनि रोकिएको छ। प्रसादका अनुसार हालसम्म पाँच चरणको वार्ता भइसकेको छ, तर अमेरिकी पक्षले अगस्ट २५ देखि प्रस्तावित छैटौं चरणको वार्ता स्थगित गरेको छ।
दुई देशले गैर-संवेदनशील कृषि उत्पादनहरू सहित वस्तुहरूको व्यापार उदारीकरणमा छलफल गरिरहेका थिए।
भदौ ४, २०८२ बुधबार ०९:५३:५८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
