अमेरिकाद्वारा छ हजारभन्दा बढी अन्तर्राष्ट्रिय विद्यार्थीको भिसा खारेज, यस्तो छ कारण

एजेन्सी : अमेरिकी विदेश मन्त्रालयले अमेरिकी कानुनको उल्लङ्घन र भिसा अवधिभन्दा बढी बसेको आरोपमा ६ हजारभन्दा बढी अन्तर्राष्ट्रिय विद्यार्थीहरूको भिसा खारेज गरेको छ।

मन्त्रालयका अनुसार, भिसा खारेज गरिनुको अधिकांश कारणहरूमा कुटपिट, मादक पदार्थ सेवन गरी सवारी चलाउनु (मापसे), चोरी र आतंकवादलाई समर्थन जस्ता गतिविधिहरू रहेका छन्।

ट्रम्प प्रशासनले आप्रवासन र अन्तर्राष्ट्रिय विद्यार्थीहरूमाथि कडा नीतिहरू लागू गरिरहेको बेला यो कदम चालिएको हो।

विदेश मन्त्रालयले ‘आतंकवादलाई समर्थन’ भन्नाले के हो भनेर स्पष्ट नपारे पनि ट्रम्प प्रशासनले प्यालेस्टाइनको समर्थनमा प्रदर्शन गर्ने केही विद्यार्थीहरूलाई लक्षित गरेको छ। प्रशासनले त्यस्ता प्रदर्शनलाई ‘यहुदीविरोधी व्यवहार’ भएको तर्क गर्दै आएको छ।

खारेज गरिएका छ हजार विद्यार्थी भिसाहरूमध्ये लगभग चार हजार भिसा कानुन तोडेका कारण खारेज गरिएको मन्त्रालयले जनाएको छ।

थप २००-३०० भिसा ‘INA 3B अन्तर्गत आतंकवादी गतिविधि’का कारण खारेज गरिएको बताइएको छ। यो कानुनले ‘आतंकवादी गतिविधि’ लाई मानव जीवनलाई खतरामा पार्ने वा अमेरिकी कानुन उल्लङ्घन गर्ने कार्यको रूपमा विस्तृत रूपमा परिभाषित गर्दछ।

यस वर्षको सुरुमा ट्रम्प प्रशासनले अन्तर्राष्ट्रिय विद्यार्थीहरूका लागि भिसा अन्तर्वार्ताको समयतालिकालाई रोकेको थियो। जुनमा पुनः सुरु गर्दा, प्रशासनले सबै आवेदकहरूलाई विस्तृत जाँचका लागि आफ्नो सामाजिक सञ्जाल खाताहरू सार्वजनिक गर्न लगाइने घोषणा गरेको थियो।

प्रशासनले ‘अमेरिकी नागरिक, संस्कृति, सरकार, संस्था वा संयुक्त राज्य अमेरिकाका संस्थापक सिद्धान्तहरूप्रति कुनै पनि प्रकारको शत्रुताको सङ्केत’ खोजिने बताएको थियो।

विदेश मन्त्रालयका अधिकारीहरूलाई ‘विदेशी आतंकवादीहरू र राष्ट्रिय सुरक्षाका लागि अन्य खतराहरूलाई वकालत गर्ने, सहायता गर्ने वा समर्थन गर्ने; वा गैरकानुनी रूपमा यहुदीविरोधी उत्पीडन वा हिंसा गर्नेहरू’को जाँच गर्न पनि निर्देशन दिइएको थियो।

डेमोक्र्याटहरूले भने ट्रम्प प्रशासनको विद्यार्थी भिसा खारेज गर्ने प्रयासको विरोध गर्दै यसलाई ‘उचित कानुनी प्रक्रियामाथिको आक्रमण’ भनेका छन्।

विदेशी विद्यार्थीहरूको तथ्याङ्क सङ्कलन गर्ने संस्था 'ओपन डोर्स'का अनुसार, सन् २०२३-२४ को शैक्षिक सत्रमा २१० भन्दा बढी देशका ११ लाखभन्दा बढी अन्तर्राष्ट्रिय विद्यार्थीहरू अमेरिकी कलेजहरूमा भर्ना भएका थिए।

भदौ ३, २०८२ मंगलबार ०८:४३:१९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।