५५ लागिन् मनिषा : १२ अफेयरको चर्चा अनि छोटो वैवाहिक जीवन, क्यासरलाई जितेपछि बनिन् ‘हीरामण्डी’ मा ‘मल्लिकाजान’

एजेन्सी : बलिउडमा आफ्नो छुट्टै साम्राज्य स्थापना गरेकी नेपाली चेली मनिषा कोइराला आज आफ्नो जन्मदिन मनाइरहेकी छिन्। सुभाष घईको फिल्म ‘सौदागर’ बाट बलिउडमा धमाकेदार डेब्यु गरेकी मनिषाको जीवन कुनै फिल्मको कथाभन्दा कम छैन।

सफलताको उत्कर्ष, अहंकारको भुल, रक्सी र लागूऔषधको अँध्यारो सुरुङ, असफल वैवाहिक जीवन र क्यान्सरसँगको कठिन लडाइँ। यी सबैलाई जितेर आज उनी फेरि एक पटक अभिनयको शिखरमा छिन्।

हालै नेटफ्लिक्समा रिलिज भएको वेब सिरिज ‘हीरामण्डी’ मा ‘मल्लिकाजान’को शक्तिशाली भूमिकाले उनको अभिनय कलालाई नयाँ उचाइ दिएको छ।

प्रतिष्ठित राजनीतिक कोइराला परिवारमा जन्मिए पनि मनिषाको पारिवारिक जरामा संघर्ष छ। उनका जिजुबुवा कृष्णप्रसाद कोइराला नेपालका एक ठूला व्यापारी थिए, तर तत्कालीन शासकसँग विवाद भएपछि उनले सर्वस्व त्यागेर भारतमा निर्वासित जीवन बिताउनुपरेको थियो।

भारतमा उनले सडकमा फूलमाला बेचेर आफ्ना छोराछोरीको पालनपोषण र शिक्षादीक्षाको व्यवस्था गरेका थिए।

मनिषाले एक अन्तर्वार्तामा भनेकी थिइन्, ‘मेरी हजुरआमाले सुनाउनुहुन्थ्यो, हजुरबुबासँग एक जोर कपडा मात्र हुन्थ्यो, जुन दिनभर लगाएर साँझमा धुनुहुन्थ्यो। आदर्श, स्वाभिमान, संघर्ष र त्याग हाम्रो परिवारको रगतमा छ। मेरो बाल्यकाल यस्तै कथाहरू सुनेर र साधारण जीवनशैलीमा बित्यो।’

बनारस र दिल्लीमा अध्ययन गरेकी मनिषाको पहिलो सपना अभिनेत्री बन्नु थिएन, उनी डाक्टर बन्न चाहन्थिन्। तर, जब एक जनाले उनलाई ‘तिम्रो विज्ञान कमजोर छ, तिमी डाक्टर बन्न सक्दैनौ’ भनेर चुनौती दिए, उनले त्यसलाई प्रतिष्ठाको विषय बनाइन् र दिनरात मेहनत गरेर विज्ञानमा सबैभन्दा बढी अंक ल्याएर देखाइन्।

पकेट खर्च जुटाउन मोडलिङ सुरू गरेकी उनको झुकाव बिस्तारै अभिनयतिर बढ्यो। सन् १९८९ मा नेपाली फिल्म ‘फेरि भेटौँला’ बाट अभिनय यात्रा सुरू गरेकी मनिषालाई ‘सौदागर’ ले बलिउडको ढोका खोलिदियो।

‘सौदागर’ को सफलतापछि पनि उनको यात्रा सहज थिएन। विधु विनोद चोपडाको कालजयी फिल्म ‘१९४२: अ लभ स्टोरी’ को अडिसनमा उनले ठूलो अपमान सहनुपरेको थियो। पहिलो अडिसनपछि विधुले उनलाई ‘तिमी त भयानक अभिनेत्री रहिछौ’ भन्दै अस्वीकार गरेका थिए।

यो कुरा मनिषाले आफ्नो पुस्तक ‘हील्ड’ मा उल्लेख गरेकी छिन्। तर, उनले हार मानिनन्। एक दिनको समय मागेर रातभर अभ्यास गरिन् र अर्को दिन यस्तो उत्कृष्ट अडिसन दिइन् कि विधु विनोद चोपडा चकित भए। यही फिल्मले उनको करियरलाई नयाँ उचाइ दियो।

छोटो समयमा पाएको अपार सफलताले मनिषालाई केही हदसम्म अहंकारी बनाएको उनी आफैँ स्वीकार गर्छिन्।

उनले भनेकी छिन्, ‘जब बिना मेहनत सफलता मिल्छ, तपाईंलाई लाग्छ कि सारा संसार तपाईंको वरिपरि घुम्छ। म त्यस्तै भएँ।’

करियरको यही उचाइमा रहँदा उनको व्यक्तिगत जीवन, विशेषगरी प्रेम सम्बन्धहरू, सधैँ मिडियाको चर्चामा रहे। उनको नाम विवेक मुशरान, नाना पाटेकर, डीजे हुसेन, नाइजेरियाली व्यवसायी सेसिल एन्थोनी, आर्यन वैददेखि अस्ट्रेलियाली राजदूत क्रिस्पिन कनरोयसम्म, करिब एक दर्जन व्यक्तिसँग जोडियो।

यीमध्ये अभिनेता नाना पाटेकरसँगको उनको सम्बन्ध सबैभन्दा बढी विवादास्पद र चर्चित रह्यो। तर, यिनै चर्चा र करियरमा आएको उतारचढावका बीच उनी रक्सी र लागूऔषधको लतमा फसिन्, जसले उनको व्यावसायिक र व्यक्तिगत जीवनलाई तहसनहस बनाएको भास्करमा उल्लेख छ।

सन् २०१० मा व्यवसायी सम्राट दाहालसँग विवाह गरेकी उनको सम्बन्ध पनि लामो समय टिक्न सकेन र दुई वर्षमै टुङ्गियो।

जीवनको सबैभन्दा अँध्यारो मोडमा पुगेका बेला सन् २०१२ मा मनिषालाई पाठेघरको क्यान्सर भएको पत्ता लाग्यो। तर, उनले हिम्मत हारिनन्।

अमेरिकाको न्युयोर्कमा करिब एक वर्षको कठिन उपचारपछि उनले क्यान्सरलाई जितिन् र नयाँ जीवन पाइन्। आफ्नो यो संघर्षपूर्ण यात्रालाई उनले आफ्नो पुस्तक ‘हील्ड: हाउ क्यान्सर गेभ मी अ न्यू लाइफ’ मा मार्मिक रूपमा प्रस्तुत गरेकी छिन्।

क्यान्सरलाई जितेपछि मनिषाले सन् २०१७ मा ‘डियर माया’ बाट अभिनयमा पुनरागमन गरिन्। ‘सञ्जु’ फिल्ममा नरगिस दत्तको भूमिकामा पनि उनको अभिनयको प्रशंसा भयो।

तर, सञ्जय लीला भन्सालीको भव्य वेब सिरिज ‘हीरामण्डी’ मा ‘मल्लिकाजान’ को शक्तिशाली र जटिल भूमिकाले उनलाई फेरि एकपटक अभिनयको महारानीका रूपमा स्थापित गरेको छ। यो सिरिजमा उनको अभिनयको चौतर्फी प्रशंसा भयो, जसले उनको जीवनको दोस्रो इनिङ्स अझ शानदार हुने संकेत दिएको छ।

राजकीय विरासत, सडकको संघर्ष, सफलताको उन्माद, पतनको पीडा र मृत्युसँगको लडाइँ- यी सबै अनुभवले मनिषालाई आज एक परिपक्व र शक्तिशाली कलाकार बनाएको छ। उनको जीवनको कथाले असफलता र कठिनाइ अन्त्य होइन, बरु एउटा नयाँ र बलियो सुरूवातको अवसर हो भन्ने देखाउँछ।

साउन ३१, २०८२ शनिबार १२:४८:४५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।