पोखरामा नयाँ शोरूम खोल्दै बीवाईडीले सार्वजनिनक गर्यो सिलायन ७
पोखरा : नेपालमा बीवाईडी अटो इन्डष्ट्रिज कम्पनी लिमिटेडका आधिकारिक बिक्रेता साइमेक्स इंक प्रा. लि. ले पश्चिमी क्षेत्रमा आफ्नो उपस्थिति बलियो बनाउँदै पोखरामा नयाँ बीवाईडी शोरूम सञ्चालनमा ल्याएको छ। सोही अवसरमा गण्डकी प्रदेशका ग्राहकहरूको लागि बीवाईडीको नवीनतम इलेक्ट्रिक सवारी साधन ‘बीवाईडी सिलायन ७’ पनि सार्वजनिक गरिएको छ।
उद्घाटन समारोहमा पोखरा महानगरपालिकाका मेयर धनराज आचार्य मुख्य अतिथिको रूपमा उपस्थित थिए। समारोहमा अटोमोबाइल क्षेत्रका प्रमुख सरोकारवालाहरू, सञ्चारकर्मीहरू र बीवाईडीका प्रशंसकहरूले पनि सहभागिता जनाएका थिए।
बुद्धचोक, पोखरामा रहेको नयाँ शोरूम बीवाईडीको नवीनतम कर्पोरेट आइडेन्टिटी/भिजुअल आइडेन्टिटी अनुसार पूर्ण रूपमा अपडेट गरिएको छ। शोरूमले १२,८४५ वर्ग फिट क्षेत्र ओगटेको छ र यहाँ थ्रीएस सुविधा (सेल्स, सर्भिस र स्पेयर) उपलब्ध छ, जसले ग्राहकलाई एउटै स्थानमा सबै सेवाहरू सहज रूपमा प्राप्त गर्ने अवसर दिन्छ। शोरूमको ठीक पछाडि निर्माण भइरहेको अत्याधुनिक सर्भिस सेन्टरले बिक्री पछिको सेवा प्रणालीलाई अझ प्रभावकारी बनाउनेछ, जसले बीवाईडीको विश्वव्यापी सेवा उत्कृष्टता मापदण्डलाई कायम राख्ने सुनिश्चित गर्दछ।
साइमेक्स इंकका अध्यक्ष अनिल श्रेष्ठले भने, “पोखरा हाम्रो दीर्घकालीन व्यापार रणनीतिमा प्रमुख बजार हो। नयाँ शोरूम र प्रिमियम गुणस्तरका उत्पादनमार्फत हामी ग्राहकलाई उत्कृष्ट सेवा दिने हाम्रो प्रतिबद्धता पुनः पुष्टि गर्दैछौं। बीवाईडी सिलायन ७ हाम्रो अत्याधुनिक प्रविधि र नेपालको दिगो यातायाततर्फको रूपान्तरणमा हाम्रो मिशनको प्रतिनिधित्व गर्छ।”
पोखरामा रहेका सबै बीवाईडी सर्भिस कर्मचारीहरू हेडक्वाटरबाट तालिम प्राप्त गरी आधिकारिक प्रमाणपत्र हासिल गरिसकेका छन्, जसले ग्राहकलाई प्रत्येक चरणमा उच्चतम स्तरको सेवा प्रदान गर्नेछ।
यस विस्तारसँगै साइमेक्सले पोखरामा मात्र नभई गण्डकी प्रदेशका ग्राहकहरूलाई पनि नवीनतम इलेक्ट्रिक सवारी साधनहरू नजिक पुर्याउँदै, नेपालको इलेक्ट्रिक मोबिलिटी क्षेत्रमा बीवाईडीको नेतृत्व अझ बलियो बनाएको छ।
साउन ३०, २०८२ शुक्रबार २०:११:५७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
