२९ जिल्लाका साढे २७ हजार पशुमा लम्पी स्किन रोगको संक्रमण

काठमाडौं : २९ जिल्लाका करिब साढे २७ हजार पशुमा लम्पी स्किन रोगको संक्रमण देखिएको छ।

कृषि तथा पशुपन्छी विकास मन्त्रालयले उपलब्ध गराएको गत असार ६ देखि साउन २० गते सम्मको तथ्यांक अनुसार सूदूरपश्चिम बाहेकका सबै प्रदेशका पशुमा लम्पी स्किन रोगको संक्रमण देखिएको हो।

रोगका कारण सबैभन्दा बढी कोशी प्रदेश प्रभावित भएको छ । कोशीका ११ जिल्लामा २२ हजार १२२ वटा पशुमा रोगको संक्रमण देखिएको छ भने हाल सम्म ६३७ पशु मरेका मन्त्रालयले जनाएको छ।

मधेश प्रदेशका ८ जिल्लामा ४ हजार ४९४ पशुमा संक्रमण देखिएको छ भने १७९ पशुको मृत्यु भएको छ। बागमतीका ५ जिल्लामा ७९३ पशुमा रोगको संक्रमण पुष्टि भएको र ३० वटा पशुको मृत्यु भएको छ।

त्यसैगरी, गण्डकीको एउटा जिल्लामा ७ वटा पशुमा मात्रै हाल सम्म रोग पुष्टि भएको छ भने लुम्बीनीका ३ जिल्लामा १६ वटा पशुमा रोग पुष्टि भएको छ र कर्णालीमा १ जिल्ला मात्रै रोगका कारण प्रभावित भएको छ। यी प्रदेशमा हाल सम्म रोगका कारण पशुको मृत्यु नभएको मन्त्रालयले जनाएको छ।

सरकारले हाल सम्म ५ लाख ६१ हजार ७५१ पशुलाई लम्पी स्किन विरुद्धको खोप लगाएको छ।

साउन २२, २०८२ बिहीबार ०९:५४:०६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।