नेपाल क्रिकेट संघको बोर्ड बैठक बस्दै, एनपीएलको खर्च विवरण पेश गरिँदै
काठमाडौं : नेपाल क्रिकेट संघको बोर्ड बैठक आज बस्दैछ।
बैठक पहिलो पटक आफ्नै कार्यालय मुलपानीमा बस्न लागेको हो। यसअघि संघको बोर्ड बैठक कुनै फाइभ स्टार होटलमा हुने गरेको थियो।
बैठकमा एनपीएल दोस्रो संस्करणको आयोजना र राष्ट्रिय टोलीको विश्वकप यात्रा विषयमा छलफल हुनेछ।
यसका अलावा गत मंसिर-पुसमा भएको पहिलो संस्करणको उपलब्धि तथा दोस्रो संस्करणका लागि थप गर्न सकिने विविध विषयहरूमा छलफल हुने बताइएको छ।
दोस्रो संस्करणका लागि अक्सनको मिति पनि तय भइसकेको छ।
एनपीएलको पहिलो सिजनको हिसाबकिताब सार्वजनिक नगरिएको भन्दै बोर्ड सदस्यहरूले अध्यक्षलाई पत्र लेख्दै ध्यानाकर्षण समेत गराएका थिए।
नेपाली क्रिकेट टोलीले आगामी अक्टोबरमा टी-२० विश्वकप एसिया तथा इस्ट एसिया पेसिफिक छनोटको संयुक्त रिजनल फाइनल खेल्दैछ।
त्यसको तयारीका लागि नेपाली टोली हाल भारतमा छ भने केही खेलाडीहरू नेपालमै पनि अभ्यास गरिरहेका छन्।
टी-२० विश्वकप छनोटको तयारी र विश्वकपसम्मको यात्राबारे पनि बोर्ड बैठकमा छलफल हुनेछ। नेपाली टोलीले सेप्टेम्बरमा वेस्ट इन्डिजसँग ऐतिहासिक टी-२०आई खेल पनि खेल्दैछ।
त्यस्तै क्यानको वार्षिक क्यालेन्डरबारे पनि छलफल हुने बताइएको छ।
साउन १५, २०८२ बिहीबार ०८:४५:३४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
