कन्नड अभिनेत्री राम्यालाई बलात्कार र हत्याको धम्की, दर्शनका फ्यानविरुद्ध दिइन् प्रहरीमा उजुरी

एजेन्सी : कन्नड अभिनेत्री तथा मान्ड्याकी पूर्व सांसद राम्या (दिव्या स्पन्दना)ले अभिनेता दर्शन थुगुदीपाका फ्यानहरूविरुद्ध प्रहरीमा उजुरी दर्ता गराएकी छिन्। सामाजिक सञ्जालमा आफूलाई लगातार बलात्कार गर्ने र ज्यान मार्ने धम्की आएपछि उनले यो कदम चालेकी हुन्।

रेणुकास्वामी हत्या प्रकरणमा मुख्य अभियुक्तका रूपमा रहेका अभिनेता दर्शनलाई कडा कारबाहीको माग गर्दै सामाजिक सञ्जालमा पोस्ट गरेपछि राम्यालाई बलात्कार गर्ने र ज्यान मार्ने धम्की आउन थालेको थियो।

राम्याले सोमबार प्रहरी आयुक्तको कार्यालय र राज्य महिला आयोगमा उजुरी दिएकी हुन्। उनको उजुरी स्वीकार गरी अनुसन्धानका लागि साइबर क्राइम ब्रान्चमा पठाइएको छ। उजुरीमा ४३ वटा सामाजिक सञ्जाल खाताहरूलाई लक्षित गरिएको छ।

सञ्चारमाध्यमसँग कुरा गर्दै राम्याले भनिन्, ‘एक सेलिब्रिटी भएकाले सामाजिक सञ्जालमा ट्रोलिङको बानी नै परिसकेको छ, तर यसपटकको जस्तो कहिल्यै भोगेकी थिइनँ।’

उनले धेरै खाताहरूबाट धम्की आए पनि निकै अश्लील र धम्कीपूर्ण टिप्पणी गर्नेहरूविरुद्ध मात्र उजुरी दिएको स्पष्ट पारिन्।

अभिनेत्रीका अनुसार, उनले २४ जुलाईमा रेणुकास्वामी हत्या प्रकरणमा सर्वोच्च अदालतको कारबाहीसँग सम्बन्धित एउटा समाचार सेयर गरेकी थिइन्, जसमा उनले पीडित परिवारले न्याय पाउनुपर्ने माग गरेकी थिइन्।

हालै सर्वोच्च अदालतले रेणुकास्वामी हत्याकाण्डका मुख्य अभियुक्त दर्शनलाई जमानत दिने कर्नाटक उच्च अदालतको निर्णयप्रति कडा टिप्पणी गरेको थियो। त्यसपछि राम्याले एक पोस्टमा लेखेकी थिइन्, ‘सर्वोच्च अदालत आम भारतीय जनताका लागि आशाको किरण हो। रेणुकास्वामीको परिवारले न्याय पाओस्।’

के हो रेणुकास्वामी हत्या प्रकरण?
कन्नड अभिनेता दर्शन थुगुदीपामाथि आफ्नै फ्यान रेणुकास्वामी (पुरुष)को हत्या गरेको आरोप छ। रेणुकास्वामीको शव गत जुन ९ मा बेङ्गलुरुको कामाक्षीपाल्या क्षेत्रमा रहेको एउटा अपार्टमेन्ट नजिकै फेला परेको थियो।

प्रहरी अनुसन्धानअनुसार, ३३ वर्षीय मृतक रेणुकास्वामी अभिनेता दर्शनका ठूला फ्यान थिए। यसै वर्षको जनवरीमा कन्नड अभिनेत्री पवित्रा गौडाले दर्शनसँग आफ्नो १० वर्षे सम्बन्धको एनिवर्सरी मनाएकी थिइन्। दर्शन पहिल्यै विवाहित भएकाले यो सम्बन्ध विवादमा तानिएको थियो।

यस खबरले रेणुकास्वामी निकै रिसाएका थिए। उनले पवित्रालाई सामाजिक सञ्जालमा निरन्तर मेसेज पठाएर दर्शनबाट टाढा रहन भनिरहेका थिए। सुरुमा पवित्राले उनका मेसेजलाई बेवास्ता गरे पनि पछि रेणुकास्वामीले आपत्तिजनक मेसेज पठाउँदै धम्की दिन थाले।

त्यसपछि पवित्राले दर्शनलाई रेणुकास्वामीलाई ‘सजाय’ दिन उक्साएको आरोप छ। दर्शनले आफ्ना साथीहरूको सहयोगमा रेणुकास्वामीलाई अपहरण गराएर एउटा गोदाममा लगे। त्यहाँ हत्या गर्नुअघि उनलाई नृशंस यातना दिइएको थियो।

प्रहरीका अनुसार, गोदाममा दर्शन र उनका साथीहरूले रेणुकास्वामीलाई कुटपिट गरे, जसकारण उनको मृत्यु भयो। हत्यापछि उनीहरूले रगत लागेका कपडा नजिकैको पसलबाट नयाँ कपडा किनेर फेरेका थिए।

प्रहरीले घटनास्थल वरपरको सीसीटीभी फुटेज जाँच गर्दा दर्शन र पवित्रा अपराध स्थलबाट निस्किँदै गरेको देखिएको थियो। राति ११ बजेदेखि ३ बजेसम्म दुवैको मोबाइल नम्बर त्यही क्षेत्रमा सक्रिय रहेको पाइएको थियो। यही प्रमाणको आधारमा प्रहरीले जुन ११, २०२४ मा दर्शन र पवित्रा गौडालाई पक्राउ गरेको थियो।

साउन १३, २०८२ मंगलबार ०९:५६:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।