मोटरसाइकलमा डोको जोडेर तरकारी व्यापार, एक सिजनमा पाँच लाख आम्दानी

तुलसीपुर : मोटरसाइकलको पछाडि जोडिएका दुई वटा डोको। त्यही मोटरसाइकल र डोकोबाट चलेको छ, दाङ तुलसीपुर उपमहानगरपालिका–४ माथिल्लो हलवारी निवासी धनराज बुढाथोकीको दैनिकी। उनले मोटरसाइकलमा जोडिएका डोकोमा तरकारी बोक्छन्। गाउँ अनि बजारमा बेच्छन्। १० वर्षदेखि आफैँले उत्पादन गरेको तरकारी यसरी नै बजारमा बिक्री गर्दै आएको उनले बताए।

“मैले १० वर्ष भयो तरकारी खेती गरेको”, उनले भने, “यही तरकारी मोटरसाइकलको पछाडि जोडिएको डोकोमा लगेर बजार बिक्री गर्दै आएको छु, यसले नै घरखर्च धानेको छ।”    

हरेक दिन बिहान ५ बजे उठेर उनले काँक्रा र बोडी गाउँ गाउँमा बेच्छन्। उनी तरकारी बिक्री गर्न खाद्रे, बनहरी, तल्लो ग्वारखोला, माथिल्लो ग्वारखोला, कपडादेवी, मोतीपुर, राजापुरसम्म पुग्छन्। अहिले दैनिक पाँच क्विन्टल तरकारी र काँक्रा बिक्री गर्ने गरेको उनले बताए।

“विगतका वर्षमा दैनिक सात-आठ क्विन्टलसम्म बिक्री गर्थे”, उनले भने, “यसबर्ष त्यति बजार पाएको छैन, त्यही पाँच क्विन्टलसम्म बिक्री गर्ने गरेको छु।”    

उनले बोडीलाई ५० किलोमा बिक्री गर्दै आएका छन्। काँक्रा एक सय रुपैयाँमा साढे दुई केजी बिक्री गर्दै आएका छन्। बोडी र काँक्राको सिजन असारदेखि साउनको अन्तिमसम्म रहन्छ। जसमा बोडी एक सिजनमा दुई लाखसम्मको कारोबार हुन्छ भने काँक्रा पाँच लाखसम्म कारोबार हुन्छ। यसमा खर्च कटाएर चारदेखि पाँच लाखसम्म एक सिजनमा आम्दानी हुने उनले बताए।

अब बोडी र काँक्राको सिजन सकिनै थालेको भन्दै टमाटर खेती गर्ने तयारी गरेको उनले सुनाए। वैशाखमा रोपिएका काँक्राले असार र साउनमा आम्दानी दिने र साउनमा रोपिएको टमाटरले कात्तिकदेखि चैतसम्म आम्दानी दिने उनले जानकारी दिए।

साउन १०, २०८२ शनिबार १७:४७:३९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।