कौसीमा ‘ड्रागन फ्रुट’ खेती गरेर वार्षिक आठ लाख आम्दानी

नवलपरासी : नवलपरासी (बर्दघाट सुस्तापूर्व) नवलपुरको कावासोती-९ निवासी सीता जिसी राउतले कौसीमा ड्रागन फल खेती गरेर वार्षिक रु आठ लाख सम्म आम्दानी गरेका छन्। 

तीन वटा बिरुवाबाट कौसीमा सुरुआत गरेको सो खेती हाल १३५ वटा गमलामा विस्तार गरेका छन्। उनले बारीमा ४२४ वटा बोट रोपेका छन्। घरमै खान भनी चार वर्ष पहिले सुरु गरेको खेती अहिले व्यावसायिक बनेको हो। 

‘युट्युब’बाट हेरेर प्रभावित भई उनले कौसीमा ड्रागन फल खेती सुरुआत गरेका थिए। सुरुमा मलेसियन सी भेराइटीको जम्मा तीन वटा बिरुवा रु दुई हजार एक सयमा पनौतीबाट ल्याएर लगाएका थिए। कौसीमा खेती सुरु गर्दा रु २५ हजार लगानी लागेको उनले बताए। उनले फल मात्र होइन बिरुवा पनि बिक्री गरेर आम्दानी लिँदै आएका छन्। 

‘मैले सुरुमा आफ्नै लागि बिरुवा तयार गरेर लगाएँ, त्यसले राम्रो फल दियो, बिरुवा सफल भएपछि मैले बिरुवा बिक्री गर्न थाले, अहिले म कहाँ धेरै जना बिरुवा लिन आउनुहुन्छ। यसपालि करिब रु दुई लाखको त बिरुवा नै बेचेँ’, जिसीले भने। 

गत असार पहिलो सातादेखि उत्पादन सुरु भएकामा तीन लट बिक्री गरी हाल चौथो लट टिप्न थालेका छन्। असार महिनामा मात्रै साढे तीन क्वीन्टल ड्रागन फल बिक्री गरेका छन्। 

बजारका लागि कुनै समस्या नभएको उनको भनाइ छ। स्थानीय बजार र मुख्य सहरहरू नारायणगढ, काठमाडौँदेखि बुटवलसम्म उनले बिक्री गर्दै आएका छन्। पानी ट्याङ्की राखेका फलामका डण्डी, छतमा प्रयोग भएको रेलिङले नै पिल्लरको काम गर्ने हुँदा कौसीमा लगानी कम लाग्ने, पात नहुँदा झरेर फोहर हुने पिर नहुने, अनि धेरै घाम र थोरै पानी भए पुग्ने भएकाले, कौसी खेतीका लागि ड्रागन फ्रुट खेती एकदमै उपयुक्त रहको जिसीको अनुभव छ।

साउन १०, २०८२ शनिबार १४:२६:३४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।