हवाई सेवा प्राधिकरणको अध्यक्ष कम्तीमा १५ वर्ष अनुभव भएको स्वतन्त्र व्यक्तिलाई बनाउनु पर्छ : सांसद सोबिता गौतम
काठमाडौं : अन्तर्राष्ट्रिय सम्बन्ध र पर्यटन समितिको बैठकमा नेपाल हवाई सेवा प्राधिकरणको गठन गर्दा ब्यूरोक्रेसीलाई भन्दा प्राविधिक पक्षलाई हेर्नुपर्ने सांसदहरूले धारणा राखेका छन्।
शुक्रबार राष्ट्रिय स्वतन्त्र पार्टी (रास्वपा) सांसद सोबिता गौतमले हवाई क्षेत्रको सुरक्षाका लागि प्राविधिकरुपमा हेर्नुपर्ने बताइन।
‘नेपाल हवाई सेवा प्राधिकरणको गठन गर्दा ब्यूरोक्रेसीलाई भन्दा पनि प्राविधिक रुपमा विधेयकलाई हेर्नुपर्छ। यसको सम्बन्ध प्रत्यक्ष यात्रुसँग हुने भएकाले टेक्निकल पार्टलाई ध्यान दिनुपर्छ,’ गौतमले भनिन्।
सांसद गौतमले प्राधिकरणको समिति गठन गर्दा हवाई क्षेत्रमा कम्तीमा १५ वर्ष अनुभव भएको व्यक्ति अध्यक्ष हुनुपर्ने बताइन्।
‘प्राधिकरणको अध्यक्ष, सदस्यहरूमा विवाद नगरी हवाई क्षेत्रको सुरक्षाको लागि हवाई क्षेत्रमा कम्तीमा १५ वर्ष अनुभव भएको त्यस उड्यान क्षेत्रमा विज्ञता प्राप्त स्वतन्त्र व्यक्ति अध्यक्ष हुनुपर्छ,’उनले भनिन्।
उनले प्राधिकरणको अध्यक्षको कार्यकाल एक पटक पुरा भएपछि पुनः अर्को कार्यकालका लागि छनोट नहुने व्यवस्था गर्नुपर्ने पनि बताइन्।
सो क्रममा सांसद राज किशोर यादवले समिति बैठकमा उठेका मुद्दाहरूलाई समय सान्दर्भिक रुपमा सम्बोधन हुनुपर्ने धारणा राखे।
साउन २, २०८२ शुक्रबार १६:४९:५७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
