४३ लागिन् प्रियंका : तीन पटक आत्महत्याको प्रयास, छ जनासँग ब्रेकअपपछि १० वर्ष कान्छा गायकसँग विवाह

एजेन्सी : बलिउडदेखि हलिउडसम्म आफ्नो अभिनयको दममा छुट्टै पहिचान बनाउन सफल अभिनेत्री हुन् प्रियंका चोपडा।

‘ग्लोबल स्टार’ का रूपमा चिनिने प्रियंका आज एक विलासी जीवन बिताइरहेकी छिन्, तर यो सफलताको पछाडि उनको कडा मेहनत, पीडा र हिम्मतको एक साँचो कथा लुकेको छ।

मिस वर्ल्डको ताज जितेपछि पनि प्रियंकाले बलिउडमा कैयौं पटक अस्वीकार र अपमानको सामना गर्नुपर्यो। कहिले उनको कालो वर्णको खिल्ली उडाइयो, त कहिले ‘काली बिरालो’ र ‘डस्की’ जस्ता शब्दले होच्याइयो।

एक अभिनेत्रीले त उनलाई हिरोइन बन्न लायक नै नभएको समेत भनेकी थिइन्।

निर्देशकको दुर्व्यवहार सहन नसकेर फिल्म छोडेकी प्रियंकाले बलिउडको फोहोरी राजनीतिबाट दिक्क भएर उद्योग नै छाड्ने निर्णय गरिन्। तर, आज उनले आफ्नो दममा बलिउडदेखि हलिउडसम्म नाम र दाम दुवै कमाएकी छिन्।

आज आफ्नो जन्मदिन मनाइरहेकी प्रियंकाको जीवनका केही रोचक र सङ्घर्षपूर्ण किस्साहरू यहाँ प्रस्तुत गरिएको छ:

फिल्म उद्योगमा पराईजस्तो व्यवहार
प्रियंकाले ‘रिड द रुम’ नामक पोडकास्टमा आफूले बलिउडमा भोगेको विभेदबारे खुलेर कुरा गरेकी थिइन्।

उनले भनेकी थिइन्, ‘मैले धेरै कारणले अस्वीकारको सामना गर्नुपर्यो। कहिले भूमिकाका लागि फिट छैन भनिन्थ्यो, कहिले नातावाद-कृपावादका कारण, त कहिले कसैको प्रेमिकालाई फिल्ममा खेलाउनुपर्ने भएकाले मलाई हटाइन्थ्यो। मेरो करियरमा एक यस्तो समय पनि आयो, जब कोही पनि मसँग काम गर्न चाहँदैनथे। मैले लगभग डेढ वर्षसम्म लगातार अस्वीकारको सामना गरें।’

करियरको सुरुवाती दिनमा प्रियंकाले आफ्नो कालो वर्ण र दुब्लो शरीरका कारण निकै आलोचना खेप्नुपरेको थियो।

उनले एक अन्तर्वार्तामा भनेकी थिइन्, ‘मलाई मेरो रङ्गका कारण ‘बडी शेमिङ’ को सामना गर्नुपर्यो। मलाई ‘काली बिरालो’ र ‘डस्की’ भनिन्थ्यो। मलाई लाग्थ्यो कि गोरो वर्णका सहकर्मीभन्दा मैले धेरै मेहनत गर्नुपर्छ।’

प्रियंकाले फिल्म ‘किस्मत’ मा अभिनेत्री स्मिता जयकरसँग काम गरेकी थिइन्, जहाँ स्मिताले उनकी आमाको भूमिका निभाएकी थिइन्।

स्मिताले एक अन्तर्वार्तामा भनेकी थिइन्, ‘मैले प्रियंकालाई पहिलो पटक देख्दा उनी निकै दुब्ली-पातली र कालो वर्णकी थिइन्। मैले मनमनै सोचें, ‘हे भगवान, यस्ता मान्छेहरू पनि कसरी हिरोइन बन्छन्!’ तर, पछि मलाई आफ्नो सोचप्रति पछुतो भयो। कसको भाग्य कहिले बदलिन्छ, भन्न सकिँदैन।’

निर्देशकको दुर्व्यवहारले फिल्म छाडिन्
उद्योगमा नयाँ भए पनि प्रियंकाले एकपटक निर्देशकको गलत व्यवहारका कारण फिल्म बीचमै छोडेकी थिइन्। यो कुराको खुलासा उनले आफ्नो आत्मकथा ‘अनफिनिश्ड’ मा गरेकी छिन्। उनका अनुसार निर्देशकले उनीसँग नराम्रो व्यवहार गरेका थिए, जसकारण उनले फिल्म छोडिन्।

तर, त्यतिबेला उनले कसैलाई पनि वास्तविक कारण बताइनन् किनकि उनलाई डर थियो कि मानिसहरूले उनीमाथि नै औंला उठाउनेछन्।

वेब सिरिज ‘सिटाडेल’ को प्रमोशनका क्रममा प्रियंकाले बलिउडको फोहोरी राजनीतिबारे खुलेर बोलिन्।

उनले भनिन्, ‘मलाई फिल्म उद्योगबाट एक्ल्याइयो। मानिसहरू मलाई फिल्ममा कास्ट गरिरहेका थिएनन्। मलाई कुनामा धकेलिँदै थियो। म यो खेलमा माहिर छैन र यही राजनीतिबाट दिक्क भएर मैले बलिउड छोडें। म एउटा अवसरको खोजीमा थिएँ, जुन मलाई अमेरिकामा मिल्यो र म उतै बस्न थालें।’

विगतका प्रेम सम्बन्ध र धोका
व्यावसायिक जीवनमा मात्र होइन, प्रियंकाले व्यक्तिगत जीवनमा पनि अनेकौं उतारचढाव भोगिन्।

सिमी गरेवालको शोमा प्रियंकाले आफूलाई १७ वर्षको उमेरमा प्रेममा धोका मिलेको बताएकी थिइन्। उनले भनेकी थिइन्, ‘त्यो धोकाले मलाई गहिरो चोट पुग्यो। म त्यो कुरा बुझ्नका लागि निकै सानी थिएँ।’

मोडलिङका दिनहरूमा प्रियंकाको अफेयर असीम मर्चेन्टसँग थियो। तर, जब उनलाई फिल्मका अफरहरू आउन थाले, उनले असीमसँग सम्बन्ध तोडिन्।

प्रियंकाका पूर्व म्यानेजर प्रकाश जाजूले उनी सङ्घर्षका दिनमा २-३ पटक आत्महत्याको प्रयास गरेको दाबी गरेका थिए। तर, प्रियंकाले यो कुरालाई खण्डन गर्दै भनेकी थिइन्, ‘जुन मान्छे मलाई दुःख दिएको आरोपमा जेल गइसकेको छ, उसको कुरामा कसरी विश्वास गर्न सकिन्छ?’

यसका अलावा प्रियंकाको अफेयर  शाहिद कपूरसँग भएको चर्चा भएको थियो। आयकर विभागले प्रियंकाको घरमा छापा मार्दा शाहिदले ढोका खोलेपछि यो कुरा बाहिरिएको थियो। उनीहरूको इन्गेजमेन्टको खबरसमेत आएको थियो, तर त्यो कहिल्यै भएन।

अक्षय र प्रियंकाको अन-स्क्रिन केमेस्ट्रीसँगै उनीहरूको अफेयरको चर्चा पनि चुलियो। यो खबर अक्षयकी पत्नी ट्विंकल खन्नासम्म पुगेपछि उनले अक्षयलाई प्रियंकासँग काम गर्न प्रतिबन्ध लगाएकी थिइन्।

फिल्म ‘डन’ को समयमा शाहरुख र प्रियंकाको निकटताको खबरले बलिउडमा तहल्का मच्चाएको थियो। शाहरुखकी पत्नी गौरी खान यो खबरले यति रिसाइन् कि उनले शाहरुखलाई प्रियंकासँग काम गर्न रोक लगाएको बताइन्छ।

हलिउड स्टार जेरार्ड बटलर प्रियंकालाई यति मन पराउँथे कि उनी प्रियंकासँग विवाह गर्न चाहन्थे, तर प्रियंकाले उनलाई असल साथी मात्र मानिन्।

अनेकौं उतारचढावपछि प्रियंकाले आफूभन्दा १० वर्ष कान्छा अमेरिकी गायक निक जोनससँग विवाह गरिन्। दुई वर्षको डेटिङपछि उनीहरूले सन् २०१८ डिसेम्बर १ मा राजस्थानको उम्मेद भवनमा हिन्दु र क्रिश्चियन परम्पराअनुसार शाही विवाह गरे।

आज यो जोडी एक छोरी ‘मालती मेरी चोपडा जोनस’ की आमाबाबु हुन्, जसको जन्म सरोगेसीमार्फत भएको हो। अनेक सङ्घर्ष र पीडालाई पछि पार्दै प्रियंका आज एक सफल र सुखी जीवन बिताइरहेकी छिन्।

साउन २, २०८२ शुक्रबार १२:३६:१८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।