साउनबाट बिहान ८ देखि रातीको ८ बजेसम्म धरहरा चढ्न पाइने, बुधबार बन्द हुने
काठमाडौं : धरहरा अब बिहान ८ बजेदेखि बेलुकी ८ बजेसम्म खुल्ने भएको छ। साउन १ गतेबाट धरहरा खुल्ने समयावधि थप हुने भएको हो।
सार्वजनिक विदाको दिन पनि अब धरहरा चढ्न पाइने शहरी विकास मन्त्रालयका प्रवक्ता नारायण मैनालीले बताए। धरहरा अहिले दैनिक बिहान १० देखि बेलुका चार बजेसम्म खुला गरिएको छ।
‘अब बिहान ८ बजेदेखि बेलुकी ८ बजेसम्म दुई सिफ्टमा धरहरा सञ्चालन गर्दैछौं। धरहरा घुम्न चाहनेहरूका लागि सार्वजनिक विदाको दिन पनि अब खुला रहनेछ। बुधबारको दिनमा भने धरहरा बन्द हुने छ,’ मन्त्रालयका प्रवक्ता मैनालीले भने।
०७२ वेशाख १२ गतेको भूकम्पले ढलेको धरहरा पुननिर्माणपछि यही असोज ३ गतेबाट परिक्षणका रुपमा खुला गरिएको थियो। गत मङ्सिर ९ गतेदेखि सर्वसाधारणलाई शुल्कसहित धरहरा खुला गरिएको थियो।
सर्वसाधारण नागरिकले धरहरा खुल्ने समय कम भएको भन्दै गुनासो गर्दै आएका थिए भने सार्वजनिक विदाको दिन बन्द नगर्न सुझाव दिएका थिए। उपप्रधानमन्त्री एवम् शहरी विकास मन्त्री प्रकाशमान सिंहका अनुसार नागरिकको सुझावलाई ध्यान दिँदै धरहरा सञ्चालनको अवधि दुई सिफ्टमा सञ्चालन गर्न लागिएको हो।
भूकम्पले क्षतिग्रस्त धरहरा पुनर्निर्माणपछि सशुल्क सञ्चालन गरिएको सात महिनाको अवधिमा टिकट बिक्रीबाट ४ करोड ३३ लाख ९३ हजार ६५० रुपैयाँ राजस्व सङ्कलन भएको सहरी विकास मन्त्रालय अन्तर्गतको केन्द्रीय आयोजना कार्यान्वयन एकाइ (भवन तथा आवास) ले जनाएको छ।
शहरी विकास मन्त्रालय अन्तर्गतको केन्द्रीय आयोजना कार्यान्वयन एकाइ (भवन तथा आवास)अन्तर्गत धरहरा सञ्चालन हुँदै आएको छ। धरहरा सञ्चालन भएको यस अवधिमा २ लाख ३७ हजार ६५ जनाले धरहरा चढी अवलोकन गरेका छन्।
विशिष्ट संरचना सञ्चालन तथा व्यवस्थापन विकास समिति (गठन) आदेश-२०८१ बमोजिम सशुल्क धरहरा सञ्चालनमा छ ।
असार ३१, २०८२ मंगलबार १६:०९:१३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
