गाजामा भएको इजरायली आक्रमणमा ४३ जनाको मृत्यु, शान्ति वार्ता स्थगित
काठमाडौं : गाजाको एक पानी वितरण केन्द्रमाथि इजरायली हवाई आक्रमण हुँदा केही बालबालिकासहित कम्तीमा ४३ जना प्यालेस्टिनीको ज्यान गएको छ। गाजाको नागरिक सुरक्षा निकायका अनुसार पछिल्लो आक्रमणपछि इजरायल र हमासबीच भइरहेको शान्ति वार्ता हाललाई रोकिएको छ।
गाजा पट्टीमा २१ महिनादेखि जारी युद्ध अन्त्य गर्न इजरायली र प्यालेस्टिनी लडाकु समूहहरूबीच एक सातादेखि दोहामा वार्ता चलिरहेको थियो। तर, पछिल्लो हिंसापछि वार्ता अचानक रोकिएको हो।
नागरिक सुरक्षा निकायका प्रवक्ता महमुद बासलका अनुसार ड्रोनबाट गरिएको आक्रमणले पानी वितरण केन्द्रमा खेलिरहेका बालबालिकालाई समेत समातेको छ। १० जना पीडितमध्ये ८ जना बालबालिका भएको उनले बताएका छन्।
इजरायली सेनाले भने मध्य गाजाको नुसिरात शरणार्थी शिविरमा लक्षित आक्रमण गर्दा ‘प्राविधिक त्रुटि’ भएको दाबी गर्दै हतियार लक्षित ठाउँभन्दा केही मिटर टाढा खसेको बताएको छ।
इजरायलका प्रमुख सहयोगी राष्ट्र अमेरिकाका पूर्व राष्ट्रपति डोनाल्ड ट्रम्पले आफू युद्धविरामका पक्षमा दबाब दिइरहेको बताउँदै भने- ‘आशा छ, हामी अर्को हप्तामा यसलाई सुधार्ने छौँ।’
तर गाजाको नागरिक सुरक्षा निकायका अनुसार, युद्ध तत्काल अन्त्य हुने कुनै सङ्केत देखिएको छैन। आइतबार गाजासहित विभिन्न स्थानमा गरिएको आक्रमणमा मात्रै ११ जना गाजा सहरमा र अरू ठाउँमा गरी ४३ जनाको मृत्यु भएको छ।
इजरायली सेनाले पछिल्ला २४ घण्टामा १५० भन्दा बढी 'आतङ्ककारी लक्ष्य'मा आक्रमण गरेको दाबी गरेको छ। यता, गाजाको स्वास्थ्य मन्त्रालयले भने युद्ध सुरु भएयता इजरायली आक्रमणमा परेर ५८ हजारभन्दा बढी प्यालेस्टिनीले ज्यान गुमाइसकेको जनाएको छ।
संयुक्त राष्ट्रसंघका निकायहरूले गाजामा इन्धन अभाव 'गम्भीर तह'मा पुगेको भन्दै २० लाखभन्दा बढी नागरिकको जीवन थप संकटमा पर्न सक्ने चेतावनी दिएका छन्।
इजरायल र हमास दुबैले वार्ता अवरुद्ध भएको दोष एकअर्कालाई दिँदै आएका छन्। दोहामा भइरहेको वार्ता शनिबारको बैठकपछि अनिश्चितकालका लागि रोकिएको हो। हमासले इजरायली सेना पूर्ण रूपमा फिर्ता गर्न माग गरिरहेको छ, तर प्यालेस्टिनी स्रोतका अनुसार इजरायलले अझै ४० प्रतिशत गाजा क्षेत्रमा सेना राख्ने प्रस्ताव अघि सारेको छ।
असार ३०, २०८२ सोमबार १५:५५:५६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
