अधिकार स्थापनाका हिसाबले माओवादी नै संस्थापन, अरू प्रतिपक्ष : अध्यक्ष प्रचण्ड

काठमाडौं : माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले नेपाली राजनीतिमा आफ्नो पार्टीलाई ‘संस्थापन’ पक्षको रूपमा दाबी गरेका छन्। उनले उत्पीडित समुदायको अधिकार र पहिचान स्थापना गर्ने हिसाबले माओवादी नै मुख्य शक्ति भएको बताएका हुन्।

बुधबार सामाजिक सञ्जालमार्फत आफ्नो भनाइ सार्वजनिक गर्दै प्रचण्डले संख्यात्मक रूपमा सदनमा तेस्रो स्थानमा रहे पनि वैचारिक, ऐतिहासिक र राजनीतिक भूमिकाका आधारमा माओवादी नै वास्तविक संस्थापन भएको तर्क गरेका हुन्।

कानुनी र संख्यात्मक हिसाबले माओवादी केन्द्र तेस्रो भए पनि यसलाई माओवादीको वास्तविक राजनीतिक हैसियत मान्न नहुने बताए। आफूहरूले ल्याएको परिवर्तन नै अहिलेको राजनीतिको मूल आधार भएको समेत दाबी गरे।

उनले भने, ‘अहिले कानुनी र सङ्ख्याको हिसाबले हामी सदनमा तेस्रो स्थानमा छौँ। तर, आजको नेपाली राजनीति, सङ्घीय लोकतान्त्रिक गणतन्त्रको संविधान, महिला, दलित, आदिवासी, जनजाति, मजदूर, किसान, मधेसी, मुस्लिम सबै उत्पीडित समुदायको अधिकार र पहिचान स्थापना गर्ने हिसाबले नेपाली राजनीतिको संस्थापन पक्ष मा‌ओवादी नै हो।’

प्रचण्डले आफ्नो यो दाबीलाई थप प्रस्ट्याउँदै अन्य शक्तिहरूलाई ‘प्रतिपक्ष’ का रूपमा चित्रण गरेका छन्। उनका अनुसार माओवादीले नेतृत्व गरेको आन्दोलनबाट स्थापित गणतन्त्र, संघीयता, धर्मनिरपेक्षता र समावेशी संविधान नै आजको राजनीतिको मूल जग हो। यस जगको रक्षा गर्ने, यसलाई थप सुदृढ गर्ने र यसका उपलब्धीहरूलाई संस्थागत गर्ने जिम्मेवारी माओवादीकै हो।

उनले अगाडि लेखेका छन्, ‘जतिसुकै सङ्ख्या भए पनि माओवादी संस्थापन हो, अरू शक्ति प्रतिपक्ष हुन्। यो संविधान र लोकतान्त्रिक गणतन्त्रको आधिकारिक पक्ष माओवादी नै हो।’

अध्यक्ष प्रचण्डले आफूहरूलाई वर्तमान राजनीतिक प्रणालीको आधिकारिक निर्माता र संरक्षकको रूपमा प्रस्तुत गर्दै अन्य दलहरूलाई यस परिवर्तनलाई आत्मसात गर्न नसकेको वा यसको मर्मभन्दा बाहिर रहेको शक्तिका रूपमा व्याख्या गरेका छन्।

असार २५, २०८२ बुधबार ११:४३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।