९ संसदीय समितिहरूको बैठक बस्दै, यस्ता छन् कार्यसूची

काठमाडौं : संघीय संसद अन्तर्गत प्रतिनिधिसभा र राष्ट्रियसभा समितिहरूका आज नौ वटा बैठक बस्दै छन्। बैठकहरूमा विभिन्न महत्त्वपूर्ण विधेयकमाथि छलफल हुने कार्यसूची तय गरिएको छ।

प्रतिनिधिसभातर्फ अर्थ समिति, अन्तरराष्ट्रिय सम्बन्ध तथा पर्यटन समिति, उद्योग, वाणिज्य, श्रम तथा उपभोक्ता हित समिति, कृषि, सहकारी तथा प्राकृतिक स्रोत समिति, महिला तथा सामाजिक समिति, पूर्वाधार विकास समिति र शिक्षा, स्वास्थ्य तथा सूचना प्रविधि समितिको बैठक बस्नेछ।

त्यस्तै, राष्ट्रियसभाको संघीयता सबलीकरण तथा राष्ट्रिय सरोकार समितिको बैठक र संयुक्त समिति स्वरूप रहेको संसदीय सुनुवाइ समितिको बैठक पनि आजका लागि तय गरिएको छ।

अर्थ समितिमा बैंक तथा वित्तीय संस्था सम्बन्धी ऐन, २०७३ संशोधन विधेयकमाथि संशोधन प्रस्ताव राख्ने सदस्यहरूसँग छलफल हुनेछ।

अन्तरराष्ट्रिय सम्बन्ध तथा पर्यटन समितिमा नेपाल हवाई सेवा प्राधिकरण विधेयक, २०८१ मा संशोधनकर्तासँग छलफल गरिनेछ।

उद्योग, वाणिज्य र श्रम समितिमा सरकारले किसानलाई दिने रासायनिक मल अनुदान र त्यसको आयात तथा बिक्री वितरणसम्बन्धी कोटामाथि छलफल हुनेछ।

कृषि तथा सहकारी समितिमा आगामी कार्यक्रम र समसामयिक विषयहरूमा छलफल हुनेछ। पूर्वाधार विकास समितिमा विद्युत् विधेयक, २०८०, नवीकरणीय ऊर्जा तथा ऊर्जा दक्षता विधेयक, २०८१, सुनकोशी मरिण डाइभर्सन आयोजना लगायत विविध विषयमा छलफल गरिनेछ।

शिक्षा समितिमा विद्यालय शिक्षा विधेयक उपसमितिको प्रतिवेदनमाथि समीक्षा हुनेछ।

संघीयता सबलीकरण समितिमा स्थलगत अनुगमन प्रतिवेदनको मस्यौदामाथि छलफल हुने छ भने संसदीय सुनुवाइ समितिमा कानुन, न्याय तथा संसदीय मामिलामन्त्री तथा सुनुवाइका लागि सिफारिस भएका व्यक्तिहरूका सम्बन्धमा विचार–विमर्श गरिनेछ।

संसदका दुवै सदन प्रतिनिधिसभा असार २३ गते र राष्ट्रियसभा असार २४ गतेका लागि निर्धारित भएकाले समितिहरूमा महत्त्वपूर्ण विधेयक अगाडि बढाउने तयारीस्वरूप यी बैठकहरू सञ्चालन गरिँदैछन्।

असार २२, २०८२ आइतबार ०८:२१:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।