थाइल्याण्डमा प्रधानमन्त्री पेटोङटार्नको राजीनामा माग्दै हजारौं प्रदर्शनकारी सडकमा

बैङ्कक : थाइल्याण्डको राजधानी बैङ्ककमा शनिबार हजारौं प्रदर्शनकारीहरू प्रधानमन्त्री पेटोङटार्न सिनावात्राको राजीनामा माग्दै सडकमा उत्रिएका छन्। प्रदर्शनकारीहरूले ‘दुष्ट प्रधानमन्त्री, सत्ता छोड्’ लेखिएको झण्डा र प्लेकार्डहरू फहराउँदै राजधानीको विजय स्मारक क्षेत्रमा ठूलो भिड जमाएका थिए।

यो प्रदर्शन प्रधानमन्त्री पेटोङटार्नमाथि हालै सार्वजनिक भएको एउटा विवादास्पद टेलिफोन वार्ताका कारण भएको हो। सो फोन कलमा कम्बोडियाका एक वरिष्ठ नेतासँगको कुराकानीमा प्रधानमन्त्रीले उनलाई ‘अङ्कल’ भनेका थिए भने थाई सेनाका सीमामा रहेका कमान्डरलाई आफ्नो ‘प्रतिद्वन्द्वी’ भनी उल्लेख गरेपछि देशभर आक्रोश फैलिएको छ।

३८ वर्षीय पेटोङटार्न लामो समयदेखि सत्तामा रहेको एक वंशको प्रतिनिधित्व गर्दै आएका छन्। उनको सरकारमाथि कम्बोडियासँगको सीमा विवादमा थाइल्याण्ड कमजोर पारेको आरोप लाग्दै आएको छ। उक्त विवादका कारण उनका गठबन्धनका एक मुख्य दलले केही दिनअघि सरकारसँगको सहकार्यबाट अलग हुने घोषणा गरेको थियो।

प्रदर्शनमा सहभागी अधिकांश वृद्ध थिए र ‘पहेंलो शर्ट’ आन्दोलनका अनुभवी कार्यकर्ताहरूले नेतृत्व गरिरहेका थिए। यो समूह सन् २००० को दशकमा पेटोङटार्नका पिता थाक्सिन सिनावात्रालाई सत्ता बाट हटाउन महत्वपूर्ण भूमिका खेलेको थियो।

७० वर्षीया प्रदर्शनकारी सेरी सावाङमुएले मञ्चबाट सम्बोधन गर्दै भने, “प्रधानमन्त्रीले देशद्रोह गरेका छन्।” उनले सार्वजनिक टेलिफोन वार्ताबाट आफूले प्रधानमन्त्रीमाथि विश्वास गुमाएको बताइन् र देशको सार्वभौमिकता संरक्षण गर्न आफू त्यहाँ आएको भनिन्।

थाइल्याण्डमा राजतन्त्र र सेनाको पक्षमा रहेका ‘पहेंलो शर्ट’ तथा पूर्व प्रधानमन्त्री थाक्सिन समर्थित ‘रेड शर्ट’ समूहबीच दशकौंदेखिको राजनीतिक संघर्ष चलिरहेको छ। यी दुई समूहलाई विरोधीहरूले परम्परागत सामाजिक व्यवस्थाका लागि खतरा मान्छन्।

६४ वर्षीया जमनोङ कलानाले आफू पहिले ‘रेड शर्ट’ समूहकी सदस्य रहेको तर अहिले रङ परिवर्तन गरेर प्रधानमन्त्री पेतोङटार्नको राजीनामा माग गर्न आउने बताइन्। उनले भनिन्, “देशलाई माया नगर्ने थाइ साथीलाई देख्दा मलाई पीडा हुन्छ।”

प्रदर्शनकारीहरूले प्रधानमन्त्री पेटोङटार्नको नेतृत्वको सरकारप्रति असन्तुष्टि प्रकट गर्दै आगामी दिनमा आन्दोलन अझै बढ्ने संकेत गरेका छन्।

असार १४, २०८२ शनिबार २२:०८:३१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।