रूसी आक्रमणमा युक्रेनका ७ जनाको मृत्यु, दर्जनौं घाइते

एजेन्सी : पूर्वी युक्रेनको ड्निप्रो सहरमा रुसले गरेको क्षेप्यास्त्र आक्रमणमा कम्तीमा ७ जनाको ज्यान गएको छ भने धेरै सर्वसाधारण घाइते भएका छन्। युक्रेनी अधिकारीहरूका अनुसार घाइतेहरूमध्ये १० जना बालबालिका पनि छन्, जसको अवस्था गम्भीर छ।

यस हमलाअघि युक्रेनकै सुमी क्षेत्रमा ड्रोन आक्रमण भएको थियो, जसमा पाँच वर्षका बालकको ज्यान गएको बताइएको छ।

राष्ट्रपति भोलोदिमिर जेलेन्स्की यसैबीच नेदरल्याण्डमा आयोजना भएको सुरक्षा सम्मेलनमा सहभागी हुन पुग्नुभएको छ, जहाँ रुसमाथि थप प्रतिबन्ध र सहयोगबारे मित्र राष्ट्रहरूसँग छलफल हुँदैछ।

ड्निप्रोपेत्रोभ्स्क क्षेत्रीय उद्धार सेवाले सार्वजनिक गरेका तस्बिरहरूमा उद्धारकर्ताहरू घाइतेको उपचार गरिरहेको दृश्य देखिन्छ। गम्भीर घाइतेहरूलाई तत्काल अस्पताल पुर्याइएको जनाइएको छ।

युक्रेनका परराष्ट्रमन्त्री आन्द्रिय सिबीगाले भनेका छन्, 'जब विश्वका नेताहरू शान्ति र सुरक्षाबारे छलफल गर्दै छन्, रूस भने हिंसा र त्रास फैलाउँदैछ। यस्तो बेलामा रूसमाथि थप दबाब आवश्यक छ।'

क्षेत्रीय प्रमुख सेर्गी लिसाकका अनुसार ड्निप्रोमा ७ जनाको मृत्यु हुनुका साथै नजिकैको सामर गाउँमा पनि २ जनाको ज्यान गएको छ र ९ जना घाइते भएका छन्।

ड्निप्रो नगरप्रमुख बोरिस फिलाटोभले आक्रमणलाई पूर्ण युद्ध सुरु भएयता ड्निप्रोमाथिको सबैभन्दा क्रूर र निर्लज्ज आक्रमण भनेका छन्।

हाल रूसी सेनाले ड्निप्रोपेत्रोभ्स्क क्षेत्रतर्फ आक्रमण तीव्र बनाएको छ, जुन क्षेत्रमा अघिसम्म उनीहरूको उपस्थिति थिएन। आक्रमणबाट विद्यालय, स्वास्थ्य संस्था र यात्रुवाहक रेलसमेत क्षतिग्रस्त भएको जनाइएको छ।

यसअघि सुमी क्षेत्रमा भएको अर्को आक्रमणमा तीन सर्वसाधारणको मृत्यु भएको थियो। क्षेत्रीय प्रमुख ओलेग ग्रिगोरोवका अनुसार, 'उनीहरू एउटै टोलका परिवार थिए। रातको निद्रामा आक्रमण हुँदा तिनीहरूको जीवन सधैंका लागि बदलिएको छ।'

असार १०, २०८२ मंगलबार २१:३५:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।