ट्रम्पद्वारा अमेरिकी र चिनियाँ अधिकारीबीच व्यापार वार्ताको घोषणा

एजेन्सी : अमेरिकी राष्ट्रपति डोनाल्ड ट्रम्पले अमेरिका र चीनका अधिकारीहरूबीच व्यापार सम्झौताका विषयमा हुने बैठकबारे जानकारी दिएका छन्। उनले शनिबार आफ्नो सामाजिक सञ्जाल ट्रुथ सोसियलमार्फत यसको घोषणा गरेका हुन्।

ट्रम्पले लेखेका छन्, ‘मलाई यो जानकारी गराउन पाउँदा खुसी लागेको छ कि अमेरिकी कोष सचिव स्कट बेसान्ट, वाणिज्य सचिव हावर्ड लुटनिक र व्यापार प्रतिनिधि जेमिसन ग्रीरले जुन ९, २०२५ सोमबार लन्डनमा चिनियाँ प्रतिनिधिहरूलाई भेट्नेछन्। यो बैठक व्यापार सम्झौताको बारेमा हुनेछ।’

यो बैठकको घोषणा हुनुभन्दा अघि शुक्रबार डोनाल्ड ट्रम्प र चिनियाँ राष्ट्रपति सी जिनपिङबीच व्यापारका विषयमा टेलिफोन वार्ता भएको थियो। सो फोन वार्तापछि अमेरिकी राष्ट्रपति ट्रम्पले आफूले चीन भ्रमणको योजना बनाएको र सी जिनपिङलाई अमेरिका भ्रमणको निम्तो दिएको बताएका थिए।

वास्तवमा, दुवै देशले एकअर्कालाई व्यापार सम्झौता उल्लङ्घन गरेको आरोप लगाइरहेका छन्। यो सम्झौताको मुख्य उद्देश्य दुई देशहरू बीच लगाइएको शुल्क (भन्सार) घटाउनु थियो। ट्रम्पले यस सम्झौतालाई ‘पूर्ण रूपमा रिसेट’ भनेका थिए।

यसअघि, यस वर्षको फेब्रुअरीमा ट्रम्पले धेरै देशका सामानमा कर लगाएका थिए, जसमध्ये चीनबाट आउने सामानमा सबैभन्दा बढी थियो। प्रतिक्रियामा चीनले पनि अमेरिकी सामानहरूमा भारी शुल्क लगाएको थियो, जसले दुई देशहरू बीचको व्यापार युद्धलाई अझ गहिरो बनाएको थियो।

यसपछि, मे महिनामा दुवै देशले व्यापार सम्झौताको बारेमा जेनेभामा एक बैठक गरेका थिए।

यस व्यापार सम्झौताअन्तर्गत अमेरिकाले चीनबाट आयात हुने सामानमा लाग्ने भन्सार १४५ प्रतिशतबाट घटाएर ३० प्रतिशतमा झारेको थियो भने चीनले अमेरिकी सामानमा लाग्ने भन्सार १२५ प्रतिशतबाट घटाएर १० प्रतिशतमा पुर्याएको थियो।

जेठ २४, २०८२ शनिबार ०८:००:५६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।