ट्रम्पसँगको वाकयुद्धपछि मस्कले बन्द गरे स्पेसएक्सको ड्र्यागन अन्तरिक्ष यानको काम

एजेन्सी : अमेरिकी राष्ट्रपति डोनाल्ड ट्रम्प र स्पेसएक्सका सीईओ एलोन मस्कबीच चर्को वाकयुद्ध चलेको छ।

ट्रम्पले एलोन मस्कका कम्पनीहरूलाई दिइँदै आएको ‘सरकारी अनुदान र सरकारी ठेक्काहरू अन्त्य गर्ने’ बताएपछि उनीहरूबीच वाकयुद्ध चलेको हो।

यदि ट्रम्प र मस्कबीचको तनाव बढ्यो भने यसले मस्कलाई हानि पुर्याउनेछ। मस्कका दुई कम्पनीहरू, स्पेसएक्स र टेस्लाले अमेरिकी सरकारबाट प्रत्यक्ष अनुदान पाउँदै आएका छन्।

यसअघि, लामो समयदेखि ट्रम्पका सहयोगी स्टिभ ब्याननले ह्वाइट हाउसलाई ‘आज स्पेसएक्स कब्जा गर्न’ प्रस्ताव गरेका थिए। यसपछि, मस्कले स्पेसएक्सको ड्र्यागन अन्तरिक्ष यानको काम बन्द गर्ने बताए।

यस अन्तरिक्ष यान मार्फत अमेरिकी अन्तरिक्ष एजेन्सी नासाले अन्तरिक्ष यात्रीहरूलाई अन्तरिक्ष स्टेशनमा पठाउँछ। तर, अब मस्कले अब यस्तो नगर्ने बताएका छन्।

स्पेसएक्ससँगका धेरै सम्झौताहरू वर्गीकृत छन्, त्यसैले तिनीहरूको बारेमा धेरै जानकारी सार्वजनिक रूपमा उपलब्ध छैन। यद्यपि, सरकारी कागजातहरूका अनुसार, स्पेसएक्सलाई सरकारले २०२४ मा ३.८ अर्ब डलर दिएको थियो।

बीबीसीको रिपोर्ट अनुसार, स्पेसएक्सका अध्यक्ष ग्वेन शटवेलले कम्पनीको सरकारसँग २२ अर्ब डलरको सम्झौता भएका बताएका छन्। समाचार एजेन्सी रोयटर्सका अनुसार, यसमध्ये कम्पनीले नासाबाट १५ अर्ब डलर प्राप्त गरेको थियो।

जेठ २३, २०८२ शुक्रबार १३:०२:४५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।