विदेश पठाइदिन्छु भन्दै पैसा कुम्ल्याएर फरार भएका तीन जना समातिए
काठमाडौं : सोझासाझा युवा खोज्ने, विदेश पठाइदिन्छु भन्ने अनि पैसा कुम्ल्याएर फरार हुने तीन जनालाई प्रहरीले समातेको छ।
पक्राउ परेकाहरूमा काठमाडौं गोकर्णेश्वर नगरपालिका–३ बस्ने दोलखा जिरीका ३६ वर्षीय जितेन्द्र बस्नेत, काठमाडौं महानगरपालिका–१५ बस्ने उदयपुरगढीका ३६ वर्षीय नरेन्द्र बहादुर तामाङ र काठमाडौं महानगरपालिका–२६ बस्ने स्याङ्जा वालिङका ५६ वर्षीय नर बहादुर खड्का छन्।
जितेन्द्रले क्रोएसिया पठाइदिने भन्दै एकजनाबाट पाँच लाख रुपैयाँ, नरेन्द्रले युएई पठाइदिने भन्दै दुईजनाबाट तीन लाख, र नर बहादुरले पोर्चुगल पठाइदिने नाममा एकजनाबाट चार लाख पैँसट्ठी हजार रुपैयाँ लिएका थिए। पैसा बुझिसकेपछि उनीहरू सम्पर्कविहीन भएका थिए।
पीडितहरूको उजुरीपछि काठमाडौं उपत्यका अपराध अनुसन्धान कार्यालय टेकुबाट खटिएको टोलीले जितेन्द्र र नरेन्द्रलाई शुक्रबार र नर बहादुरलाई आइतबार काठमाडौंका विभिन्न स्थानबाट पक्राउ गरेको हो।
पक्राउ परेका तीनैजनालाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।
वैदेशिक रोजगारीको नाममा ठगी गर्ने गिरोह सक्रिय भइरहँदा सचेत रहन प्रहरीको आग्रह छ।
वैशाख २२, २०८२ सोमबार १८:०४:१५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
