गुजरात टाइटन्सको शानदार जित, तालिकाको दोस्रो स्थानमा उक्लियो

काठमाडौं : गुजरात टाइटन्सले इण्डियन प्रिमियर लिग (आईपीएल) अन्तर्गत मंगलबारको खेलमा सनराइजर्स हैदराबादलाई ३८ रनले हराउँदै अंक तालिकाको दोस्रो स्थानमा उक्लिएको छ।

नरेन्द्र मोदी स्टेडियममा भएको खेलमा टस हारेर पहिले ब्याटिङ गरेको गुजरातले निर्धारित २० ओभरमा ६ विकेट गुमाएर २२४ रनको विशाल स्कोर खडा गर्यो। जवाफमा हैदराबादले ६ विकेटको क्षतिमा १८६ रन मात्र बनाउन सक्यो।

हैदराबादका लागि ओपनर अभिषेक शर्माले ४१ बलमा ६ छक्का र ४ चौकासहित ७४ रनको आकर्षक इनिङ खेले। तर अन्य ब्याटरले लामो साथ दिन सकेनन्। ट्रेभिस हेडले २०, हेन्रिक क्लासनले २३, नितिश कुमार रेड्डीले २१, प्याट कमिन्सले १९ र इशान किशनले १३ रन बनाए।

गुजरातका लागि मोहम्मद सिराज र प्रसिद्ध कृष्णले समान २ विकेट लिए भने इशान शर्मा र गेराल्ड कोट्जेले १/१ विकेट हात पारे।

यसअघि, गुजरातका ओपनर साइ सुदर्शन र कप्तान शुभमन गिलले पहिलो विकेटका लागि ८७ रनको साझेदारी गर्दै उत्कृष्ट सुरुवात दिलाए। सुदर्शनले २३ बलमा ९ चौकासहित ४८ रन बनाए। गिलले आक्रामक प्रदर्शन गर्दै ३८ बलमा १० चौका र २ छक्का प्रहार गर्दै ७६ रन जोडे।

त्यसपछि जोश बट्लरले गिलसँग दोस्रो विकेटका लागि ६२ रनको साझेदारी गर्दै टोलीको स्कोर उकासे। बट्लरले ३७ बलमा ६४ रन बनाए। वासिङ्टन सुन्दरले अन्त्यतिर २१ रनको योगदान दिए।

हैदराबादका बलरमध्ये जयदेव उनाडकटले अन्तिम ओभरमा ३ विकेट लिए। प्याट कमिन्स, जिशान अन्सारी र एक जना बलरले समान १-१ विकेट लिए।

यस जितसँगै गुजरात १४ अंकसहित अंक तालिकाको दोस्रो स्थानमा पुगेको छ भने हैदराबाद ६ अंकसहित नवौं स्थानमा रहेको छ।

वैशाख २०, २०८२ शनिबार ०७:२६:२६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।