राउटे मुखिया सूर्यनारायण शाहीको मृत्यु

सुर्खेत : राउटे समुदायका मुखिया सूर्यनारायण शाहीको मृत्यु भएको छ। ४९ वर्षीय शाहीको गएराति बराह ताल गाउँपालिका–८ सोतखोलामा रहेको बस्तीमा मृत्यु भएको हो। 

अत्यधिक मदिरा सेवनका कारण मुखिया शाहीको मृत्यु भएको राउटे समुदायसँग काम गर्दै आएका सोसेक नेपालका शिक्षक लालबहादुर खत्रीले जानकारी दिए।

‘नयाँ वर्षमा यो समुदायमा ठूलो चाड मनाउने प्रचलन हुन्छ। त्यहीँ बेलादेखि उहाँ विरामी हुनुहुन्थ्यो,’खत्रीले भने, ‘पछिल्लो पाँच दिनयता विरामीले च्यापेपछि सुतिरहने तर नउठ्ने गरेपछि अस्पताल लैजान सम्झाउने गरेका थियौं। तर उहाँको गएराति नै मृत्यु भयो।’

राउटे समुदाय विरामी भएपछि उपचारका लागि अस्पताल जान मान्दैनन्। ‘मुखियाले अस्पताल गएका सबैको मृत्यु भएको छ म पनि जाँदैन भन्नुहुन्थ्यो,’खत्री भन्छन्, ‘सोमबारसम्म अवस्था हेरौं नभएर मंगलबार उपचारका लागि वीरेन्द्रनगर जाउला भन्नुभएको थियो । गएराति ९ बजेतिर उहाँको मृत्यु भयो।’

तीन जना मुखिया रहेको राउटे समुदायका मुख्य मुखिया सूर्यनारायण थिए । २०७२ जेठमा मुखिया चुनिएका उनी रास्कोटी गोत्रका हुन्। एक महिनाअघि मात्रै उनीहरू वीरेन्द्रनगर–१४ छेडामा भेट्नेगरी गिरीघाटबाट छुट्टिएका थिए।

२१ घरधुरी वीरेन्द्रनगर-१३ करेखोला किनारामा बसिरहेका छन्। मुखिया शाहीको नेतृत्वमा बाँकी २१ घरधुरी बराहतालको सोतकोला किनाराहुँदै श्रीचौर नजिकै पुगेको हो।

राउटे समुदायको चलनअनुसार तीन वर्षको फरकमा छुट्टाछुट्टै बाँडिने गरेका छन्। मुखियाको मृत्यु भएपछि यो समुदायको संख्या घटेर १३५ मा झरेको छ।

वैशाख १६, २०८२ मंगलबार १८:३६:४० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।