हामी निर्णायक लडाइँमा छौँ, यस्तो बेला नियमित भन्दा अलि बढी बल लगाउनुपर्छ - शिक्षक महासंघ अध्यक्ष

काठमाडौं : सरकार र आन्दोलनरत शिक्षक महासंघबीच शनिबार बिहान वार्ता हुँदैछ। वार्ताका लागि सरकारले बिहान साढे ७ बजेको समय तय गरेको छ।

महासंघका प्रतिनिधि अहिले वार्ताका लागि सिंहदरबारस्थित शिक्षा मन्त्रालय जाने तयारी गर्दैछन्।

वार्तामा जानुअघि महासंघका अध्यक्ष लक्ष्मीकिशोर सुवेदीले आन्दोलन जारी रहने भन्दै नियमित झैँ बिहान ११ बजे माइतीघरमा भेला हुन शिक्षकहरूलाई आग्रह गरेका छन्।

बिहान सामाजिक सञ्जालमा लेखेर उनले निर्णायक र अन्तिम लडाइँ रहेको बताएका छन्।

‘हामी निर्णायक र अन्तिम लडाईंमा छौँ। यस्तो वेला नियमित भन्दा बढी बल लगाउनु पर्छ’, उनले लेखेका छन्। 

सरकार र महासंघबीच शुक्रबार नै वार्ता तय भए पनि अन्तिम समयमा भाँडिएको थियो। शिक्षामन्त्री रघुजी पन्तको आह्वानका आधारमा वार्तामा बस्न शिक्षक महासंघको टोली गएको थियो।

तर सिंहदरबार पुग्दा शिक्षक संघ–संगठनका २५ प्रतिनिधिको नाम जारी भएको देखेपछि महासंघको टोली फर्किएको थियो।

वैशाख १३, २०८२ शनिबार ०७:२३:४४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।