सापकोटा चोकमा कारको ठक्करबाट एक जनाको मृत्यु

चितवन : जिल्लाका छुट्टा-छुट्टै दुर्घटनामा परी एक जनाको मृत्यु भएको छ। तीन जना घाइते भएका छन्।

मृत्यु हुनेमा पर्साको सकुहवा प्रसौनी गाउँपालिका-२ बस्ने अन्दाजी २५ वर्षीय लालबाबु पासवान रहेका छन्।

जिल्ला प्रहरी कार्यालय चितवनका प्रहरी नायब उपरीक्षक रवीन्द्र खनालका अनुसार भरतपुर महानगरपालिका-४ सापकोटा चोक नजिक बाप्र ०६-००१ च ०३४९ नम्बरको कारले पैदलयात्री पासवानलाई ठक्कर दिएको थियो।

आज बिहान कारको ठक्करबाट घाइते पासवानको उपचारका क्रममा भरतपुर अस्पतालमा मृत्यु भएको हो। कार र चालकलाई प्रहरीले नियन्त्रणमा लिएको छ।

यस्तै रत्ननगर नगरपालिका-६ दाराहात्ती चोकमा जङ्गल सफारी गरिरहेको जीप दुर्घटना हुँदा तीन जना घाइते भएका छन्। ना४च ३३५५ नम्बरको जीप आफैँ अनियन्त्रित भई दुर्घटना हुँदा जीपमा सवार तीन जना घाइते भएका हुन्।

खनालका अनुसार जीपमा सवार अन्य सात जना सकुशल रहेका छन्। घाइते तीनै जनाको अजस्था खतरामुक्त रहेको उनले बताए। जीप चालकलाई प्रहरीले नियन्त्रणमा लिएको छ।

वैशाख १, २०८२ सोमबार १२:२२:४६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।