अमेरिकामा चिनियाँ सामानमाथि १४५ प्रतिशत कर, नौ दिनमा चौथोपटक वृद्धि
एजेन्सी : अमेरिकी राष्ट्रपति डोनाल्ड ट्रम्पले बिहीबार चीनमाथिको भन्सार शुल्क १४५ प्रतिशत पुर्याएका छन्।
यसअघि बुधबार उनले चीनमा १२५ प्रतिशत कर लगाउने घोषणा गरेका थिए भने नेपालसहित लगभग ७५ देशहरूमा १० प्रतिशत आधारभूत कर लगाउने घोषणा गरेका थिए।
चीनमा १४५ प्रतिशत कर लगाउनुको अर्थ चीनमा बनेको १०० डलरको उत्पादन अब अमेरिका पुग्दा २४५ डलर पर्नेछ। अमेरिकामा चिनियाँ सामान महँगो हुँदै गएकाले यसको बिक्री घट्नेछ। चीनले पनि अमेरिकामाथि ८४ प्रतिशतको प्रतिशोधात्मक कर लगाएको छ।
अमेरिकी सरकारी बन्ड बजारमा फेरि बिक्री सुरु भयो। उही समयमा, शेयर बजारको नास्ड्याक कम्पोजिट सूचकांक लगभग ७ प्रतिशतले घट्यो।
यससँगै एप्पल, एनभिडिया लगायतका कम्पनीहरूको शेयर पनि घट्यो। तेलको मूल्य लगभग ४ प्रतिशतले घट्यो, कच्चा तेल अब प्रति ब्यारेल ६३ डलरभन्दा तलको मूल्यमा कारोबार भइरहेको छ।
ट्रम्पले फेब्रुअरी १ मा चिनियाँ उत्पादनहरूमा १० प्रतिशत कर लगाए भने मार्च ३ मा यसलाई बढाएर २० प्रतिशत पुर्याए। यसपछि, अप्रिल २ मा, यसलाई बढाएर ५४ प्रतिशत, अप्रिल ९ मा बढाएर १०४ प्रतिशत र अप्रिल १० मा १४५ प्रतिशत पुर्याए।
बिहीबार ट्रम्पले ७५ भन्दा बढी देशहरूले अमेरिकी प्रतिनिधिहरूलाई बोलाएर छलफल गरेकाले ९० दिन होल्ड गरेको बताएका छन्। भन्सार शुल्कमा यो होल्डले नयाँ व्यापार सम्झौताहरूमा वार्ता गर्न समय प्रदान गर्ने विश्वास लिइएको छ।
यसअघि अप्रिल २ मा उनले विभिन्न देशहरूको लागि पारस्परिक ट्यारिफ घोषणा गरेका थिए। यसअन्तर्गत नेपालमाथि १० प्रतिशत भन्सार पनि लगाइएको थियो।
चैत २९, २०८१ शुक्रबार ०८:४७:४९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
