नेपाल प्रहरीले नियन्त्रणमा लियो पञ्जाब पुलिसको ‘एन्टी-ग्याङ्स्टर टास्क फोर्स’, भारतको गृह मन्त्रालयले जारी गर्यो सर्कुलर
काठमाडौं : बलिउड फिल्महरूमा हामीले भारतीय सुरक्षा एजेन्सीहरूले नेपाली भूमिमा गुप्तचर कार्यहरू गरिरहेको देखेका छौँ। नेपाल आउन भारतीयलाई पासपोर्ट आवश्यक पर्दैन। यस्तो अवस्थामा धेरै राज्यका प्रहरीहरू अनुसन्धानको लागि गोप्य रूपमा नेपाल आउने गरेको ओपन सेक्रेट नै हो। भारतको पञ्जाब प्रहरीले पनि यस्तै योजना बनायो।
पञ्जाब प्रहरीको एन्टी-ग्याङ्स्टर टास्क फोर्स एक अपराधीलाई समात्न गोप्य रूपमा काठमाडौं आयो। गुण्डाहरूलाई पक्राउ गर्नुअघि नै नेपाल प्रहरीले उक्त फोर्सलाई नै पक्राउ गर्यो। तर, नेपाल प्रहरीले भने यसबारेमा आधिकारिक रूपमा जानकारी नै गराएन। नेपालमा मात्र नभएर भारतमा पनि यो घटनालाई गुपचुप राख्न खोजिएको न्यूज१८ ले समाचार लेखेको छ।
हिन्दुस्तान टाइम्सले स्रोतलाई उद्धृत गर्दै केन्द्र सरकारको अपीलपछि पञ्जाब प्रहरीको टोलीलाई नेपाल सरकारले रिहा गरेको जनाएको छ। फेब्रुअरी महिनामा भएको घटनापछि मार्चमा भारतको गृह मन्त्रालयले सबै राज्य र केन्द्र शासित प्रदेशहरूको लागि एक आदेश जारी गर्दै कुनै पनि विदेशी भूमिमा अनुसन्धानको लागि जानु अघि अनिवार्य अनुमति लिन भन्यो।
पञ्जाब प्रहरीले के भन्यो?
त्यहाँका एक अधिकारी स्थानीय सञ्चारमाध्यमलाई दिएको अन्तर्वार्तामा बिना अनुमति प्रहरी टोली नेपालमा छिर्दा भारतीय पक्षलाई लज्जित बनाएको टिप्पणी गरेका छन्। नेपाल र भारतका प्रहरी अधिकारीहरूले यो घटनालाई गोप्य राख्न खोजेका थिए।
नेपालको गृह मन्त्रालयका सहसचिव तथा प्रवक्ता रामचन्द्र तिवारीले हिन्दुस्थान टाइम्ससँग कुराकानीमा त्यस्तो कुनै घटनाको बारेमा जानकारी नभएको दाबी गरेका छन्। यसबारेमा बुझ्न उकेराले तिवारीलाई सम्पर्क गर्दा फोन उठेन।
उता पञ्जाब एजीटीएफका प्रमुख प्रमोद बानले पञ्जाब प्रहरी जानकारी सङ्कलन गर्न नेपाल गएको स्वीकार गरे पनि त्यहाँ कुनै पनि प्रकारको अपरेशन भने नगरेको दाबी गरे। घटनापछि भारतको गृह मन्त्रालयले सबै राज्य र केन्द्र शासित प्रदेशका मुख्य सचिवहरू र डीजीपीहरूलाई एउटा पत्र लेख्यो, जसमा पञ्जाब र नेपालको नाम थिएन।
‘हालैको एउटा घटनामा राज्य प्रहरीको टोलीले अनुमति बिना उक्त देशमा फौजदारी मुद्दाको अनुसन्धान गरेको देखिएको भनिएको थियो। विदेश भ्रमण गरेको थियो, जसले गर्दा प्रतिकूल परिस्थिति सिर्जना भयो’, मन्त्रालयको निर्देशनमा भनिएको छ।
निर्देशनमा अगाडि भनिएको छ, ‘विदेशी प्रहरी कर्मचारीहरूले आपराधिक मुद्दाहरूको अनुसन्धानको लागि कुनै पनि विदेशी देशमा, विदेशी देशका सक्षम अधिकारीहरूको पूर्व स्वीकृति बिना र विदेश मन्त्रालय वा सम्बन्धित भारतीय मिसनको जानकारी बिना भ्रमण गर्दा भारतलाई लज्जित तुल्याउन सक्छ। त्यसैले अनुसन्धानको लागि कुनै पनि विदेश यात्रा गर्नु अघि उपयुक्त स्तरमा उचित क्लियरेन्स लिइएको सुनिश्चित गर्न प्रहरी कर्मचारीहरूलाई निर्देश गरिन्छ।’
चैत २६, २०८१ मंगलबार ११:५४:३५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
