तीनकुने घटनाबारे ओलीले भने- अहिल्यै न्यायिक छानविन आयोग गठन हुँदैन
काठमाडौं : प्रधानमन्त्री केपी शर्मा ओलीले तीनकुने घटनाको बारेमा अहिल्यै न्यायिक छानबिन आयोग गठन नहुने बताए।
थाइल्यान्डको औपचारिक भ्रमणबाट फर्केपछि विमानस्थलमा सञ्चारकर्मीहरूसँग कुरा गदै उनले अहिल्यै न्यायिक छानविन नहुने बताए।
उनले भने, ‘अहिले नै न्यायिक छानविन नभनौं, हुनपनि सक्छ, नहुन पनि सक्छ। सबै कुरामा न्यायिक छानविन नै चाहिन्छ भन्ने पनि छैन। त्यो विचार गर्छौँ।’
चैत १५ गते राजावादीले गरेको प्रदर्शन हिंसात्मक बनेको घटनाको छानविन गर्नको लागि अहिले न्यायिक छानविन समिति गठन गर्न माग भइरहेको बेलामा प्रधानमन्त्रीले यस्तो जवाफ फर्काए।
यसअघि हिजो बसेको राज्य व्यवस्था तथा सुशासन समितिको बैठकमा गृहमन्त्री रमेश लेखकले तीनकुने घटना राजनीतिक नभई आपराधिक भएकाले न्यायिक छानविन आयोग गठन नहुने बताएका थिए।
चैत २३, २०८१ शनिबार १४:१५:२६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
