नि:शुल्क उपचारको निर्देशन बेवास्ता, सांसद शर्माको अस्पतालले पैसा नतिरी घाइतेलाई डिस्चार्ज नै गरेन

काठमाडौं : चैत १५ गते राजावादीहरूको प्रदर्शनमा घाइतेमध्ये केही शुक्रबार बिहानैदेखि काठमाडौंको सिनामंगलस्थित काठमाडौं मेडिकल कलेज (केएमसी अस्पताल)बाट डिस्चार्ज भएर घर जाने तरखरमा थिए। तर, एक हप्तापछि घर जान पाउने खुसीमा झोला तयार गरिसकेका उनीहरू सामु एकाएक औषधिको खर्च भन्दै बिल आयो।

शुक्रबार केएमसीबाट डिस्चार्ज हुने तयार गरिएका घाइते कुमारजङ्ग रानाको २१ हजार आठ सय ४६, बिशाल निरौलाको १८ हजार र विकास गौतमको १४ हजार दुईसय दुई र आशिष बोहोराको नाममा १८ हजार बिल आयो।

डिस्चार्ज हुने तयारी भएको घाइतेहरूले अस्पताल प्रशासनदेखि भेट्न पुगेकाहरूलाई पैसा छुटका लागि फोन गरे। तर, पैसा तिर्नुको विकल्प भेटेनन्।

त्यसैले आन्दोलनमा मलद्वार नजिकै गोली लागेका आशिषका बुवाले १८ हजार जुटाएर केएमसी अस्पतालमा बुझाउँदै छोरालाई डिस्चार्ज गरेर लिएर हिँडे।

‘छोरा बच्यो त्यहि खुसी मान्नु पर्यो नि,’ आशिषका बुवाले उकेराकर्मीसँगको कुराकानीमा भने, ‘सबैले निःशुल्क भने, अस्पतालले निःशुल्क नभने पछि तिरेर हिड्यौँ।’

आशिष डिस्चार्ज भए पनि अन्य घाइते भने अस्पतालमा पैसा तिर्ने सुरमा थिएनन्। तर, साँझ हुनै लाग्दा समेत कसैले पनि ‘शुल्क तिर्न पर्दैन’ भन्ने औपचारिक खबर पाएनन् उनीहरूले।

त्यस्तै, खुट्टा र कम्मरमा गोली लागेको घाइते कुमारजङ्गकी श्रीमतीले आफन्तबाट पैसा जुटाएर अस्पतालमा तिरिन्। त्यसपछि मात्र कुमार डिस्चार्ज भए। पैसा तिरेको केही घण्टापछि अस्पतालबाट डिस्चार्ज भएर बाहिरिँदा अस्पतालको गेटमा आन्दोलनमा घाइते भएकाहरूको लागि भनेर सूचना टाँसेको थाहा पाए।

जसमा ‘१५ गते बसेको मन्त्रिपरिषद् बैठकबाट घाइतेहरूको निःशुल्क उपचार गर्ने भनिसकेकाले डिस्चार्ज हुँदा सहज गरिदिनु’ भनेर जिल्ला प्रशासन कार्यालय काठमाडौंको पत्र टाँसेको रहेछ। सूचना पढेपछि उनलाई एकछिन पैसा नतिरी बसेको भए हुने रहेछ भन्ने लागेछ।

‘श्रीमतीले पैसा तिर-तिर भनेको छ। तिरेन भने त लाज हुन्छ। तिरेर गइहालौँ भनेर आफैँले पैसा जुटाएर तिरिसकिछन्,’ कुमारले भने, ‘फेरि पैसा फिर्ता दिन्छ कि भनेर सोधेको पनि हो। तर, तिरिसकेपछि आउँदैन भनेर जवाफ दिए।’

त्यस्तै ११ हजार अहिले तिरेर ‘पछि ड्रेसिङ गर्न आउँदा तिर्छु’ भनेर जान खोज्दा पनि अस्पताल नमानेको अर्का घाइते विशाल निरौलाले बताए। पैसा जुटाउँदै गर्दा सूचना टाँसिएपछि भने उनी र उनकी आमा खुसी भए। विशालको हातमा तीनवटा र एउटा कोखामा गोली लागेको थियो।

०००

मन्त्रिपरिषद्ले निर्णय गरेर राजपत्रमा प्रकाशित गरिसकेको अवस्थामा केएमसीले भने घाइतेहरूसँग उपचार बापतको पैसा लिएको छ। प्रदर्शनमा घाइते भएकाहरूलाई पैसा नतिरी अस्पतालले डिस्चार्ज नगरेको भेटियो।

केएमसीका अस्पतालका प्रशासन प्रमुख नारायण दाहालले घाइतेको उपचारबापत लागेको अन्य खर्च निःशुल्क गरे पनि औषधिको पैसा भने लिइएको स्वीकारे।

उनले भने, ‘औषधिको पैसा त तिर्नुपर्छ। पैसा नतिरी त कहाँ दिन्छन् र?’ 

मन्त्रिपरिषद्ले निर्णय गरेर राजपत्रमा प्रकाशित गरिसकेको अवस्थामा उनी भने अस्पताललाई स्वास्थ्य मन्त्रालयले घाइतेको उपचारको विषयमा कुनै पत्र नपठाएको तर्क गर्छन्। बिरामीले अस्पतालमा औषधिको पैसा तिरेपछि बिल लिएर बिरामी गृह मन्त्रालयमा गएर पैसा लिनुपर्ने प्रक्रिया रहेको उनको दाबी छ।

‘अस्ति स्वास्थ्य मन्त्रालय र अर्थ मन्त्रालयको मान्छे आउनुभएको थियो। पैसा उहाँ (घाइते)ले तिरेर बिल लिएर गृह मन्त्रालय गएपछि हामी (पैसा) दिन्छौं भन्नुहुन्थ्यो’, उनले दाबी गरे।

तर, स्वास्थ्य मन्त्रालयका प्रवक्ता डा. प्रकाश बुढाथोकी भने मन्त्रिपरिषद्ले नै निःशुल्क उपचार गर्ने घोषणा गरिसकेकाले स्वास्थ्य मन्त्रालयले अस्पताललाई छुट्टै पत्र पठाउन जरुरी नहुने बताए।

‘हामीले भने अनुसार निजामति, पाटन, बीएण्डबी, ट्रमा (निःशुल्क उपचार सेवा) सबले दिएका छन्’प्रवक्ता डा. बुढाथोकीले भने,‘केएमसीले मात्रै नदिने भन्ने हुन्छ त?’

केएमसीमा बिरामीको उपचार निःशुल्क गर्नुपर्ने विषयमा जिल्ला प्रशासन कार्यालयको प्रमुखलाई खबर गराइसकिएको उनले जानकारी दिए।

सरकारको निर्देशन अटेर गर्ने अस्पताललाई नवीकरणको समय र स्वास्थ्य उपकरण खरिदमा कर छुट गर्ने जस्ता सुविधा दिने विषयमा मन्त्रालयले विचार गर्ने उनको भनाइ छ।

केएमसी नेपाली का‌ंग्रेसका सांसद सुनिल कुमार शर्मा सञ्चालक रहेको मेडिकल कलेज हो। यसअघि पाठ्यक्रममै नभएको स्वास्थ्य शिविर कार्यक्रममा आवासीय चिकित्सकलाई अत्यधिक खटाएकोबारे विरोध गर्दा डा. विशद दाहाललाई केएमसीले निलम्बन गरेको थियो।

पछि विश्वविद्यालयले निलम्बन फुकुवा गर्न पत्र पठाउँदा समेत सञ्चालक सुनिल शर्माले निलम्बन फुकुवा नगर्ने र विशदलाई काठमाडौं विश्वविद्यालय नै फिर्ता गरिदिने विवादास्पद अभिव्यक्ति दिएका थिए।

अस्पतालमा नि:शुल्क उपचार नगरेको विषयमा सांसद शर्मासँग कुरा गर्न खोज्दा सम्पर्क हुन सकेन।

सम्बन्धित समाचार

चैत २३, २०८१ शनिबार ११:५९:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।